سیتاپور: (ایجنسی)
لکھیم پور کھیری جاتے وقت پولیس حراست میں لی گئی کانگریس کی قومی جنرل سکریٹری پرینکا گاندھی کا پی اے سی گیسٹ ہاؤس میں جھاڑو لگانے کا معاملہ طول پکڑنے لگا ہے۔ ویڈیو وائرل ہونے کے بعد کئی سوال اٹھ رہے ہیں۔ کہا جا رہا ہے کہ انہیں جھاڑو کس نے دی اور وی آئی پی گیسٹ ہاؤس کے کمرے میں دھول کہاں سے آئی۔ اب اس پورے معاملے کی جانچ بھی شروع ہوگئی ہے۔
اطلاع کے مطابق، پرینکا گاندھی نے جس جھاڑو سے گیسٹ ہاؤس کے اپنے کمرے میں صفائی کی تھی، وہ ان کے اسٹاف نے فراہم کرائی تھی۔ پرینکا گاندھی کے جھاڑو مانگنے پر اسٹاف نے گیسٹ ہاؤس کے ایک ملازم سے جھاڑو لی تھی۔ اس معاملے میں پی اے سی کے افسران نے گیسٹ ہاؤس کے ملازمین سے پوچھ گچھ کرنے کے بعد ایک رپورٹ بھی تیار کروائی گئی ہے۔ سیکنڈ کور پی اے سی کے جنرل یادویندر سنگھ نے بتایا کہ اب تک کی جانچ میں جو بات سامنے آئی ہے اس کے مطابق، پرینکا گاندھی کے اسٹاف نے ہی گیسٹ ہاؤس کے ملازم سے جھاڑو مانگی تھی، جس کے بعد ان کے پی ایس او نے جھاڑو لگانے کا ویڈیو بنایا اور اسے وائرل کر دیا گیا۔
واضح رہے کہ جس گیسٹ ہاؤس میں پرینکا گاندھی کو رکھا گیا ہے، اس میں چار کمرے ہیں۔ چاروں کمروں کو صاف صفائی کے لئے ملازمین کی تعیناتی بھی ہے۔ کمرہ بک ہو یا نہ ہو یہاں روزانہ صفائی کی جاتی ہے۔ پرینکا گاندھی کو بھی وی وی آئی پی پروٹوکول کے تحت رکھا گیا ہے، لیکن سوال یہ اٹھ رہا ہے کہ روز صفائی ہونے کے بعد بھی کمرے میں دھول کہاں سے آیا؟
