جرمنی، قبل از وقت انتخابات میں انتہائی قدامت پسند  پارٹی کامیاب

جرمنی میں قبل از وقت پارلیمانی انتخابات میں انتہائی قدامت پسند جماعت کرسچن ڈیموکریٹک یونین (سی ڈی یو) نے کامیابی حاصل کرلی۔
خبر رساں اداروں کے مطابق جرمن قدامت پسند جماعت سی ڈی یو کے رہنما فریڈرک مرٹز کی جرمن چانسلر بننے کی راہ ہموار ہو گئی ہے۔ فریڈرک مرٹز کا تعلق سابق جرمن چانسلر اینگلا مرکل کی جماعت سے ہے، مگر انہوں نے مرکل سے مختلف پالیسیاں اپنانے کا اعلان کیا ہے۔اپنے بیان میں فریڈرک مرٹز کا کہنا ہے کہ یورپ کو اپنی دفاعی صلاحیتوں کو فروغ دینا ہوگا۔فریڈرک مرٹز نے کہا کہ آہستہ آہستہ دفاعی معاملات میں امریکا سے آزادی حاصل کرسکتے ہیں، میری ترجیح یورپ کو جلد از جلد مضبوط کرنا ہے بہر حال اس کامیابی کے باوجود جماعت کو جو امید تھی وہ کامیابی نہ مل سکی۔ اس جماعت کو 30 فیصد سے بھی کم ووٹ ملے ہیں۔
فریڈرک مرز جن کی اب جرمنی کے چانسلر بننے کی راہ ہموار ہو چکی ہے اس وقت قائد حزب اختلاف ہیں۔فریڈرک مرز نے اپنے حامیوں سے خطاب کرتے ہوئے کہا کہ آج رات ہمیں جشن منانا چاہیے مگر صبح ہم سب کام پر چلے جائیں گے۔ انھوں نے کہا کہ وہ ان چیلنجز سے بخوبی آگاہ ہیں جن کا انھیں آگے سامنا کرنا ہے۔