ندوۃ العلماء لکھنؤاورتصوف و سلوک

دو لفظ:مولانا عبدالمالک بلندشہری ندوی
__اس عاجز کا  تعلق  دل دردمند، فکر ارجمند اور زبان ہوش مند ہر سہ صفات کے حامل ادارہ سے ہے جہاں عقل و قلب کے حسین امتزاج کا اور عشق و ادب کے مابین ہم آہنگی کا شروع سے ہی اہتمام رہا ہے اسی  لئے وہاں کے اکابرین کی صحبت و تلمذ سے عاجز بھی فکری و نظریاتی طور پر اصحاب معرفت و سلوک اور اہل دل اولیاء اللہ کا قدرداں، ان کی صحبت و معیت  کا خوگر اور ان کی تلاش و  جستجو میں  کسی قدر  سرگرداں رہتا ہے______
اہل علم و دانش اس بات سے بہ خوبی واقف ہیں کہ اکابرِ ندوہ کا ہر دور میں اپنے عہد کے ممتاز مشائخ سے روحانی و قلبی تعلق رہا ہے_
بانیٔ ندوہ مولانا سید محمد  علی مونگیری نور اللہ مرقدہ (1856-1927)خود نقشبندیت و چشتیت کے مجمع البحرین اور اویس زمانہ مولانا  شاہ فضل رحمان گنج مرادآبادی رح (1208-1313) کے خلیفہ اور قطب مکہ، اکابر دیوبند، مظاہر اور ندوہ کے سرخیل مولانا حاجی امداد اللہ مہاجر مکی  کے مجاز بیعت تھے..
اسی طرح معروف مؤرخ اور نزھۃ الخواطر جیسی شہرہ آفاق کتاب کے مرتب مولانا سید  عبدالحئی حسنی رح(1869-1923)اور محدثِ ندوہ مولانا حیدر حسن خان ٹونکوی رح (1864-1941) بھی آستانہ امدادیہ کے خوشہ چین بلکہ طریقت و سلوک میں ان کے مجاز بیعت تھے اور آخر الذکر تو انہیں کے سلسلہ میں بیعت بھی  کیا کرتے تھے ان کے خلفاء میں مولانا عبدالغفار نگرامی ندوی سابق استاذ ندوۃ العلماء لکھنؤ خاصے مشہور ہوئے ….مولانا حیدر حسن خان کے بعد کے دور میں سید الطائفہ علامہ سید  سلیمان ندوی رح(1884-1953)، فیلسوف اسلام مولانا عبدالباری ندوی رح(1886-1976) اور مولانا مسعود عالم ندوی رح  کا حکیم الامت مجدد الملت مولانا اشرف علی تھانوی قدس سرہ (1860-1943)  سے مسترشدانہ تعلق رہا ہے…اول الذکر  ندویَین ان کے باقاعدہ خلیفہ مجاز بیعت  ہوئے جب کہ آخر الذکر مجاز صحبت تھے… آخری دور میں مولانا سید ثانی حسنی ندوی(1925-1982)  شیخ زکریا کاندھلوی مہاجر مدنی  رح(1898-1982)  و مولانا موسی مہاجر مدنی کے خلیفہ تھے، مولانا عبدالغفار نگرانی ندوی  رح شاہ بدر علی رائے بریلی کے خلیفہ تھے، مولانا معین اللہ اندوری رح (1913-1999)  صوفی اقبال ہوشیارپوری کے خلیفہ ہوئے ہیں…. مفکر اسلام حضرت مولانا سید  علی میاں ندوی رح (1913-1999) تو اپنے عہد  کے اکثر و بیشتر مشائخ  طریقت و معرفت کے منظور نظر اور محبوب اور سلسلہ قادریہ راشدیہ میں شیخ التفسیر مولانا احمد علی لاہوری اور سلاسل اربعہ میں قطب الإرشاد مولانا شاہ عبدالقادر رائے پوری کے خلیفہ مجاز بیعت  ہیں ان کے بعد ان کے خلیفہ و جانشین مولانا سید محمد رابع حسنی ندوی (1929-2023) ہوئے جو آل انڈیا مسلم پرسنل لاء بورڈ کے صدر، دار العلوم ندوۃ العلماء کے ناظم اور لاکھوں مریدین و مسترشدین کے پیر و مرشد ہوئے
ندوہ کی یہ خصوصیات و امتیازات عہد رواں میں بھی  باقی ہیں. آج بھی علوم ظاہری و باطنی کے جامعین  کی ایک بڑی تعداد ندوہ میں موجود ہے… ناظم ندوہ میر کارواں حضرت مولانا سید بلال حسنی ندوی مدظلہ ( ولادت 1968) امام الخطاطین شیخ المشايخ صوفی سید نفیس الحسینی لاہوری(1933-2008) کے خلیفہ مجاز اور مرشد الامت مولانا سید محمد رابع حسنی قدس سرہ  ندوی کے خلیفہ و جانشین اور ان  کے سفر و حضر کے خادم، ان کے دنوں کی تپش اور شبوں کے گداز سے آگاہ اور ان کی جملہ خصوصیات و صفات کے حامل ہیں…… اور الحمد للہ ان کا روحانی و اصلاحی فیضان وسیع پیمانہ پر جاری ہے….. اللہھم زد فزد.
اسی طرح   ندوۃ العلماء لکھنؤ کے دیگر اساتذہ کرام بھی شریعت و طریقت کے جامع، اور اکابر کی روحانی نسبتوں کے امین ہیں __
مہتمم ندوہ مولانا ڈاکٹر سعید الرحمن اعظمی ندوی مدظلہ حضرت شیخ الحدیث مولانا زکریا کاندھلوی قدس سرہ کے خاص فیض یافتہ اور حضرت مولانا سید محمد رابع حسنی ندوی کے خلیفہ مجاز بیعت ہیں
اسی طرح نائب مہتمم ندوہ اور صوبہ گجرات کے مشہور و مقبول بزرگ عالم دین حضرت مولانا عبدالقادر ندوی گجراتی دامت برکاتہم بھی حضرت شیخ الحدیث مولانا زکریا قدس سرہ کے شاگرد خاص اور مرید باصفا ہیں اور حضرت مولانا سید محمد رابع حسنی ندوی سمیت متعدد بزرگوں کے خلیفہ مجاز ہیں __آپ ماشاء اللہ درس و تدریس اور انتظام و انصرام اور وعظ و خطابت کے ساتھ ارشاد و سلوک کی راہ سے بھی مخلوق کو فیض پہنچانے رہے ہیں،ملک و بیرون ملک  آپ کے مریدین کی اچھی خاصی تعداد  ہے اور کئی خوش نصیب علماء کو آپ سے خلافت بھی حاصل ہے
اسی طرح ندوہ کے شیخ الحدیث اور عظیم روحانی بزرگ حضرت مولانا زکریا سنبھلی مدظلہ، حضرت مولانا منظور نعمانی قدس سرہ کے صحبت یافتہ اور مولانا قاری صدیق باندوی کے محبوب خلیفہ ہیںان کے علاوہ ندوہ کے شیخ الحدیث ثانی اور مفتی اعظم مولانا مفتی شیخ نیاز اعظمی ندوی مدظلہ بھی حضرت مولانا سید رابع حسنی ندوی اور مشہور نقشبندی بزرگ حضرت مولانا سید محمد شاہ قریشی کے خلیفہ مجاز بیعت ہیں
اور ندوہ کے ثالث شیخ الحدیث حضرت مولانا خالد غازیپوری مدظلہ کو عالم عرب کے  مشہور رفاعی سلسلہ کے بزرگ شیخ یوسف ہاشم اور اسی طرح مولانا حکیم عبداللہ مغیثی اجراڑوی اور مولانا مفتی عبدالرحمن نوگاواں سے خلافت و اجازت حاصل ہے
اسی طرح صدر شعبۂ تفسیر مولانا سید صہیب حسینی ندوی  صوفی نفیس الحسینی لاہوری کے خلیفہ ہیں
اسی طرح مؤقر استاذ حدیث ندوہ مولانا مفتی زید مظاہری ندوی مدظلہ ،مولانا قاری صدیق باندوی قدس سرہ کے مجاز صحبت  ہیں
اسی طرح ملک کے مشہور و معروف عالم دین  اور ندوہ کے ممتاز محدث مفتی عتیق بستوی مدظلہ کو مولانا شاہ منیر احمد کالینہ ممبئ قدس سرہ سے خلافت حاصل ہے
ان کے علاوہ ندوۃ العلماء کے صدر شعبہ تجوید اور ملک کے مایہ ناز قاری مولانا قاری ریاض ندوی مظاہری مدظلہ بھی سلسلہ اشرفیہ امدادیہ کے ممتاز بزرگ مفتی ڈاکٹر ادریس حبان رحیمی بنگلور کے خلیفہ مجاز ہیں
اور استاذِ ادب ندوہ مولانا نعمان الدین سنبھلی مدظلہ، شاہ سید مصطفی رفاعی ندوی بنگلور قدس سرہ  کے مجاز  ہیں _ان کے علاوہ ندوہ کے معاون مہتمم مولانا کمال اختر ندوی مدظلہ بھی حضرت صوفی نفیس الحسینی سے نسبت رکھتے ہیں
اسی طرح مکتبۂ ندوہ کے ذمہ دار مولانا فیضان نگرامی مدظلہ بھی صوفی نفیس الحسینی کے خلیفہ ہیں 
ان کے علاوہ مشہور محقق، ممتاز مسند اور ندوہ کے مایہ ناز استاذ حدیث مولانا فیصل بھٹکلی ندوی مدظلہ کو متعدد بزرگوں سے خلافت حاصل ہے
اسی طرح مولانا عبدالسلام ندوی بھٹکلی مدظلہ استاذ حدیث ندوہ حضرت شیخ یونس جونپوری قدس سرہ کے خاص صحبت یافتہ بزرگ ہیں
رھبان بالیل و فرسان بالنھار  اور زبان و قلب کے ساتھ اقلیم دل کی بادشاہی ندوہ کی شان امتیازی رہا ہے… یہی وہ راہ صواب ہے جس پر چل کر ہمارے پیش رووں نے حیرت انگیز کارنامے انجام دئے تھے اور اسی کے ذریعہ آج بھی محیر العقول واقعات وجود پذیر ہورہے ہیں… ہر دور میں وابستگانِ ندوہ  کی بھی یہی کوشش ہوتی ہے کہ وہ زبان و ادب کی فتوحات کے ساتھ معرکہ دل بھی فتح کریں اور عقل کے مقابلہ میں عشق کو مقدم رکھیں……