لکھنؤ :
جب تک کورونا انفیکشن کنٹرول میں نہیں آتا، بنیادی اور سیکنڈری ایجوکیشن ڈپارٹمنٹ کے اسکولوں میں تعلیم آن لائن ہوگی۔ گرمی کی تعطیل کے بعد جولائی سے آن لائن کلاسز کی تیاری کی جارہی ہے۔ آن لائن کلاسز فی الحال ملتوی چل رہی ہیں۔ ریاستی حکومت نے بنیادی اسکولوںمیں 20 اور سیکنڈری اسکولوں میں 15 مئی تک تعلیمی نظام بند کر رکھا ہے۔
گرمی کی تعطیلات 20 مئی سے شروع ہوجائیں گی۔ دونوں محکموں کے حکام کا خیال ہے کہ سائنسدانوں نے جس طرح ستمبر تک کورونا کی تیسری لہر آنے اور بچوں کے لیے زیادہ خطرناک ہونے کی جانکاری دی ہے ایسے میں آن لائن کلاسز چلانا مناسب ہوگا۔ ڈائریکٹر جنرل اسکول ایجوکیشن وجے کرن آنند نے کہا کہ حکومت کی ہدایت کے بعد آن لائن کلاسز کی شروعات ہوجائے گی۔
بورڈ امتحان پر تذبذب برقرار
محکمہ ثانوی تعلیم 20 مئی تک ملتوی ہائی اسکول اور انٹرمیڈیٹ بورڈ امتحانات کے بارے میں تذبذب کا شکار ہے۔ محکمہ کے عہدیدار کا کہنا ہے کہ موجودہ انفیکشن کی حالت میں امتحان کروانا ممکن نہیں ہے، ایسی صورتحال میں سی بی ایس ای کی طرز پر ہائی اسکول کے امتحان کو منسوخ کرکے صرف انٹرمیڈیٹ امتحان کا ہی انعقاد کرانے پر غور کیا جارہا ہے۔ محکمہ کے پرنسپل سکریٹری ، انل کمار کا کہنا ہے کہ اس طرح کی تجویز آئی ہے ، لیکن اس کا فیصلہ نائب وزیر اعلیٰ اور وزیر اعلیٰ سے رہنمائی لینے کے بعد ہی ہوگا۔
