وکست بھارت کا وژن اور اردو زبان کا مشن

تحریر:حکیم نازش احتشام اعظمی
   وِکسِت بھارت (ترقی یافتہ ہندوستان) کا وژن ایک انقلابی ہدف ہے جو 2047 تک حاصل کرنے کے لیے مقرر کیا گیا ہے، جب بھارت اپنی آزادی کے 100 سال مکمل کرے گا۔اس وژن میں ایک ایسا ملک شامل ہے جو اقتصادی طور پر خوشحال، تکنیکی طور پر ترقی یافتہ، سماجی طور پر مساوی اور ثقافتی طور پر متحرک ہو۔ اگرچہ اقتصادی ترقی اور تکنیکی جدت اس وژن کی بنیاد ہیں، لیکن زبان اور ثقافتی ورثے کے کردار نظر انداز نہیں کیا جا سکتا۔
   بھارت کی لسانی روایات میں اردو زبان ایک منفرد حیثیت رکھتی ہے اور ایک بڑی آبادی کی لسانی نمائندگی کرتی ہے ۔اردوجو ادب، ثقافت اور تاریخی ورثے کی زبان ہے۔ اسے وِکسِت بھارت کے وژن کے ساتھ ہم آہنگ کرنا اس لیے ضروری ہے کہ اسے نظر انداز کرنے سے ایک بڑی آبادی کا ساتھ چھوٹ جائے گا۔
   حکومتِ ہند نے وِکسِت بھارت کے وژن میں درج ذیل اہم نکات کو شامل کیا ہے:
   1:معاشی ترقی: اس کے تحت بھارت کو ایک  کھرب ڈالر کی معیشت بنانا، جس سے صنعت، خدمات اور زراعت کے شعبے مستحکم ہوں۔
   2:تکنیکی جدت کے ذریعہ مصنوعی ذہانت (AI)،ڈیجیٹلائزیشن اور خلائی تحقیق کے میدان میں ہندوستان کا عالمی سطح پر برتری کا حصول۔
   3. سماجی یکسانیت کے لیے تمام لسانی اور ثقافتی گروہوں کو مساوی مواقع فراہم کرنا۔
   4. تعلیم اور تحقیق کے لیے ایک عالمی معیار کا تعلیمی نظام،جو تحقیق اور اختراعات کو فروغ دینے میں معاون ہو۔
   5. ثقافتی احیا کی غرض سے بھارت کے متنوع ثقافتی اور لسانی ورثے کو مضبوط بنانے کی کوشش۔
   وِکسِت بھارت کے وژن کو حاصل کرنے کے لیے ضروری ہے کہ تمام لسانی برادریوں کو ترقیاتی عمل میں شامل کیا جائے۔ اردو جو بھارت کی ایک سرکاری طور پر تسلیم شدہ زبان ہے، ثقافتی، تعلیمی، اور سماجی و اقتصادی ترقی میں اہم کردار ادا کر سکتی ہے۔اس لیے کہ اردو زبان ہندوستان کے  تاریخی اور ثقافتی سرمایہ موجود ہے۔

اردو صدیوں سے بھارت کی ادبی اور ثقافتی شناخت کا ایک لازمی حصہ رہی ہے۔ یہ مختلف برادریوں کے درمیان ایک پل کے طور پر ابھری تھی جس اس وقت فارسی عربی اور مقامی بھارتی بولیوں کے عناصر کا امتزاج رکھتی ہے۔ اسے میر، غالب،دیا شنکر نسیم ،اقبال، چکبست، پریم چند،فراق،فیض جیسے عظیم شاعروں اورادیبوں نے اس کی تربیت کی ہے ۔  اردو کا کردار صرف ادب تک محدود نہیں، بلکہ اس نے تحریکِ آزادی، صحافت ،سنیما اور علمی مباحثوں میں بھی نمایاں خدمات انجام دی ہیں۔ آج بھی یہ کی ایک مؤثر عوامی رابطے کی زبان ہے۔
   اردو کے کردار کو وِکسِت بھارت کے وژن سے ہم آہنگ کرنے کے لیے ان نکات پر توجہ دینا ضروری ہے:
1. تعلیم اور تحقیق کے شعبے میں اُردو کے کردار کی توسیع بہت اہم ہے۔تعلیم کسی بھی قوم کی ترقی کی بنیاد ہوتی ہے۔ وِکسِت بھارت میں ایک کثیرالسانی تعلیمی نظام ناگزیر ہوگا،اس سلسلےمیں اُردو زبان کئی طریقوں سے معاون ثابت ہو سکتی ہے۔اس لیے قومی تعلیمی پالیسی (NEP 2020) میں اردو کی شمولیت ضروری ہے ۔اس کے لیے اردو میڈیم اسکولوں کو مضبوط بنانے، معیاری اردو نصابی کتب کی فراہمی اور اساتذہ کی تربیت اور اردو بولنے والے طلبہ کو مرکزی تعلیمی دھارے میں شامل کرنا ہوگا ۔ساتھ ہی اردو کو تحقیق کی زبان کے طور پر فروغ دینے،تاریخ، لسانیات اور سماجی علوم کے رابطے کے طور رائج کرنے کے لیے کالجوں اور یونیورسٹیوں کے اندر اردو زبان مطالعات کے خصوصی مراکز قائم کرنے ہوں گے۔اس کے علاوہ ڈیجیٹل لائبریریوں اور آن لائن تعلیمی وسائل – اردو ادب کے ڈیجیٹل آرکائیو،اردو کی ای بکس اور آن لائن کورسز کی تیاری  کا اہتمام کرنا ہوگا ۔
   بھارت کی ثقافتی ترقیات کے لیے یہاں کے لسانی تنوع کو تسلیم کرنا ناگزیر ہے،اس کے بغیر کوئی بھی کوشش کامیابی ہمکنار نہیں ہوپائے گی۔  لھٰذا ضروری ہے کہ ادبی اور ثقافتی میلوں کے احیا،مشاعروں اور ادبی انجمنوں کے ذریعے اُردو کانفرنسوں اور ڈرامہ فیسٹیولز جیسے پروگراموں کا انعقاد اہم ہوگا ۔
   ترقی یافتہ بھارت وژن میں لسانی ضرورتوں اہمیت دینا ہوگا ۔اس ضمن اُردو کے فروغ کے لیے حکومت  کی طرف سے درج ذیل اقدام کیے جاسکتے ہیں ۔
• اردوآبادی والے شہروں میں سرکاری مواصلات کو اردو میں بھی جاری کرنا۔
• قانونی،انتظامی اور عدالتی کارروائیوں اور سرکاری دستاویزات میں اردو کے استعمال کو فروغ دینا تاکہ اردو بولنے والے شہریوں کو سہولت دی جا سکے۔
• ہنر مندی کے ترقیاتی پروگراموں میں سرکاری اسکل ڈویلپمنٹ مواد کو اردو میں ترجمہ کر کے روزگار کے مواقع پیدا کرنا۔
   اگر آج بھارت ڈیجیٹل انقلاب کی طرف بڑھ رہا ہے تو اردو کو بھی اس کا حصہ بنانا چاہیے ۔

• مصنوعی ذہانت اور اسپیچ ریکگنیشن میں اردو کو گوگل اسسٹنٹ، سری، اور دیگر AI پلیٹ فارمز میں شامل کیا جائے۔
• اردو سوشل میڈیا اور مواد کی ترقی، اردو بلاگز، وی لاگز، اور پوڈکاسٹ کو فروغ دینا تاکہ نوجوان نسل اس سے جڑی رہے۔
• ای-گورننس کے لیے سرکاری ویب سائٹس اور عوامی خدمات کے لیے اردو زبان کا آپشن مہیا کرنا۔
• اردو اشاعتی صنعت کو فروغ دینا۔اردو کتابوں اور میگزینز کی اشاعت کو مضبوط بنانے سے ملازمت کے مواقع پیدا ہوں گے۔
• سیاحت اور تاریخی مقامات پر اردو گائیڈڈ ٹورز اور ثقافتی وراثتی واکس کا انعقاد کرنا۔
• اردو بولنے والے کاروباری افراد کے لیےمالیاتی خواندگی پروگرامز اور کاروباری رہنمائی کے ذریعے اردو بولنے والے تاجروں کو مدد فراہم کرنا۔
وِکسِت بھارت کا وژن جامع، ترقی پسند، اور ثقافتی طور پر خوشحال ہے۔ اردو اپنی تاریخی اہمیت اور موجودہ دور میں اپنی افادیت کے ذریعے اس وژن میں ایک اہم کردار ادا کر سکتی ہے۔ اگر اردو کو تعلیم، ٹیکنالوجی، حکمرانی، اور ثقافت میں شامل کیا جائے، تو بھارت اپنی لسانی تنوع کو اپنی طاقت میں بدل سکتا ہے۔ترقی یافتہ بھارت صرف اقتصادی خوشحالی کا نام نہیں، بلکہ اپنی زبانوں، ثقافتوں، اور عوام کی بقا اور فروغ کا بھی عہد ہے، اور اردو اس سفر کا ایک اہم ستون ہو سکتی ہے۔