اے ایم یو۔میں  احتجاج کے دوران فلسطین کے حق میں نعرے لگانے پر اسٹوڈنٹ لیڈر طلحہ منان  سمیت دیگر پر مقدمہ درج

طالب علم رہنما اور علی گڑھ مسلم یونیورسٹی (اے ایم یو) کے سابق طالب علم طلحہ منان کے ساتھ دیگر  8-10 نامعلوم طلباء پر حالیہ فیسوں میں اضافے کے خلاف اور طلباء یونین کی بحالی کی حمایت میں اے ایم یو میں طلباء کے احتجاج کے دوران فلسطین کے حق میں نعرے لگانے کے الزام میں مقدمہ درج کیا گیا ہے۔
ہندو رکشا دل کے ضلعی صدر سنجے آریہ کی جانب سے پیر کو درج کرائی گئی شکایت کے مطابق، ایک ویڈیو میں طلحہ منان اور دیگر کو فلسطینی پرچم اٹھائے ہوئے اور فلسطین کے حق میں نعرے لگاتے ہوئے دکھایا گیا ہے، جس میں انہوں نے دعویٰ کیا تھا کہ "شہر میں سماجی امن اور ہم آہنگی کو خطرہ ہے۔”
منان اور نو نامعلوم طلباء کے خلاف بھارتیہ نیا سنہتا (بی این ایس) کی دفعہ 223 (ایک سرکاری ملازم کے ذریعہ جاری کردہ حکم کی نافرمانی) اور 353 (2) (عوامی فساد کو جنم دینے والے بیانات) کے تحت پیر کو سول لائنز پولیس اسٹیشن میں ایف آئی آر درج کی گئی۔طلحہ منان مولانا آزاد نیشنل یونیورسٹی (MANUU) حیدرآباد کے اسٹوڈنٹ لیڈر اور پی ایچ ڈی اسکالر ہیں۔احتجاج کو "غیر مجاز” قرار دیتے ہوئے شکایت کنندہ نے الزام لگایا کہ "یہ 04.08.25 سے بغیر کسی اجازت کے منعقد کیا گیا ہے۔”  انہوں نے مزید دعویٰ کیا کہ "کیمپس کے اندر احتجاجی مارچ بھی نکالے جا رہے ہیں، تقریباً روزانہ مختلف فیکلٹیز، میں ،بغیر منظوری کے۔”