کورونا کے درمیان مہاکمبھ میں تقریباً 20 لاکھ لوگوں نے اشنان کیا

ہریدوار(ایجنسی) اتراکھنڈ کے ہریدوارمیں جاری مہاکمبھ میں پیر کے روز دوسرے شاہی اشنان کے موقع پر تقریباً 20 لاکھ عقیدت مندوں نے ہر کی پوڑی سمیت مختلف گھاٹوں پر اشنان کیا۔
واضح رہے کہ ان دنوں ملک میں کورونا وائرس کی دوسری لہر سے تباہی مچی ہوئی ۔ مختلف ریاستی حکومتیں جزوی لاک ڈاؤن، نائٹ کرفیواور سخت پابندیاں عائد کی ہوئی ہیں ۔ اس درمیان آج سوموتی اماوسیا کا اشنان ہونے کے سبب ایک دن قبل عقیدت مندوں کی ایک بڑی تعداد ہریدوار پہنچی تھی ، کورونا کی وبا کی وجہ سے ہریدوار کی تمام سرحدوں پر جانچ مہم چلائی گئی تھی ، جن مسافروں کے پاس آر ٹی پی سی آرمنفی رپورٹ نہیں تھی اور جن لوگوں نے پورٹل پررجسٹریشن نہیں کرایا تھا انہیں واپس بھیج دیا گیا ۔
دریں اثنا اکھاڑا کے بہت سارے سنت کورونا سے متاثر ہونے کی وجہ سے آج کی سرگرمیوں میں حصہ نہیں لے سکیں گے۔ اکھاڑا پریشد کے صدر مہندر نریندر گِری سمیت نرنیہ اکھاڑا کے متعدد سنت کورونا سے متاثر پائے گئے ہیں۔
انسپکٹر جنرل پولیس سنجے گنجیال نے بتایا کہ پورے میلہ علاقے میں سیکورٹی کے سخت انتظامات کئے گئے ہیں۔ ہریدوار کمبھ میلہ علاقہ کو 23 سیکٹرز میں تقسیم کیا گیا ہے ، جس میں 10 زون اور نو سپر زون بنائے گئے ہیں اور ان سیکٹروں میں سینئر پولیس اور انتظامی افسران کو ذمہ داریاں دی گئی ہیں۔ ہریدوار آنے کیلئے ’روٹ پلان ‘ پہلے ہی جاری کردیا گیا تھا ، جس کے تحت ہریانہ اور اتر پردیش کے راستوں سے ہریدوار میں داخل ہونے والے عقیدت مندوں کے لئے گوری شنکر اور دکشدیپ سمیت دھیروالی پارکنگ میں گاڑیاں کھڑی کی گئیں ، جبکہ گڑھوال اور دیگر علاقوں سے آنے والے لوگوں کیلئے شمالی ہریدوار میں پارکنگ بنائی گئی ہے۔