دہلی وقف بورڈ میں آن لائن فتوی کی سہولت کا آغاز

نئی دہلی(پریس ریلیز)

دہلی وقف بورڈ روز بروز اپنی سرگرمیوں اور عوامی خدمات کا دائرہ وسیع کرتا جارہاہے۔بورڈ کے چیئرمین امانت اللہ خان کی رہنمائی میں ایک طرف جہاں ضروتمند عوام اپنے دنیاوی اور اقتصادی مسائل کو لیکر بڑی تعداد میں وقف بورڈ سے رجوع کر رہے ہیں وہیں اب شرعی مسائل میں بھی عوام کی رہنمائی دہلی وقف بورڈ سے کی جارہی ہے۔

چیئرمین امانت اللہ خان نے علماء اور ملت کے معزز افراد کے مطالبہ اور مشورہ پر دفتر وقف بورڈ دریا گنج میں 2020میں باقاعدہ شعبہ دارالافتاء کا قیام کیا تھا جس نے 2021میں باقاعدہ اپنی خدمات کا آغاز کیا جس کے لیئے باقاعدہ دو تربیت یافتہ مفتیوں اور اسلامی اسکالرکا انتظام کیا گیا۔صدر مفتی مفتی ذکاوت حسین قاسمی اور نائب مفتی محمد طیب قاسمی کی زیر نگرانی شرعی مسائل میں رہنمائی کے لیئے ضرورتمند دفتر وقف بورڈ کے شعبہ دارالافتاء سے رجوع کر رہے ہیں اور زبانی،تحریری یا فون پر مفتیان کرام سے رہنمائی حاصل کر رہے ہیں۔

اب دفتر وقف بورڈ نے عوام کی مزید سہولت کے لیئے اپنی ایمیل آئی ڈی جاری کی ہے جس پر کوئی بھی ضرورتمند انگلش،ہندی اور اردو زبانوں میں اپنے سؤالات بھیج کر شرعی رہنمائی حاصل کر سکتا ہے۔دفتر وقف بورڈ نے fatwadelhiwaqfboard@gmailکے نام سے آئی ڈی جاری کی ہے۔شعبہ کے صدر مفتی مفتی ذکاوت حسین قاسمی نے بتایا کہ دہلی وقف بورڈ کے چیئرمین امانت اللہ خان کی جانب سے اٹھایا گیا یہ ایک اہم قدم ہے۔انہوں نے کہاکہ دفتر وقف بورڈ سے عوام اپنی دنیاوی ضروریات کے لیئے رجوع کرتے ہیں تاہم اب شرعی رہنمائی بھی عوام دفتر وقف بورڈ سے حاصل کرسکتے ہیں۔