کابل : (ایجنسی)
افغانستان کے صوبے پنجشیر کے لیے طالبان اور شمالی مزاحمتی فوج کے درمیان لڑائی کا آغاز ہوگیا، شمالی مزاحمتی فوج نے 300 طالبان جنگجوؤں کو مارنے کا دعویٰ کیا ہے جبکہ طالبان نے جانی نقصان کی تردید کی ہے۔
اس سے قبل افغان رہنما امراللّٰہ صالح کا اپنے ایک بیان میں کہنا تھا کہ طالبان نے پنجشیر وادی کے داخلی راستے کے قریب افواج اکٹھی کرنے کی کوشش کی ہے، طالبان کو اس سے قبل اندراب وادی میں بھاری نقصان اٹھانا پڑا ہے۔
امراللّٰہ صالح کا اپنے بیان میں کہنا تھا کہ مزاحمتی افواج نے سالنگ ہائی وے بند کر دی ہے۔
برطانوی نشریاتی ادارے کےمطابق طالبان نے امراللّٰہ صالح کے تازہ ترین بیان پر کوئی تبصرہ نہیں کیا۔
ترجمان طالبان ذبیح اللّٰہ مجاہد نے اتوار کو اپنے بیان میں بتایا تھا کہ وہ اپنے جنگجوؤں کے ساتھ بات چیت کے ذریعے اس مسئلے کو حل کرنے کی کوشش کر رہے ہیں۔
ذبیح اللّٰہ مجاہد کا مزید کہنا تھا کہ نئی حکومت بنانے کیلئے افغان سیاسی رہنماؤں سے گفتگو جاری ہے، نئی حکومت کا اعلان جلد کر دیا جائے گا۔
