ممتا نے تیسری بار وزیراعلیٰ کے عہدے کا حلف لیا

کولکاتا:
آل انڈیا ترنمول کانگریس کی سپریمو ممتا بنرجی نے بدھ کے روز تیسری بار مغربی بنگال کی وزیراعلیٰ کے عہدے کا حلف لیا ۔گورنر جگدیپ دھنکڑ نے یہاں راج بھون میں منعقد ایک سادہ تقریب میں محترمہ بنرجی کو عہدے اور رازداری کا حلف دلایا، محترمہ بنرجی نے بنگالی زبان میں حلف لیا،حلف برداری کی تقریب میں محترمہ بنرجی کے بھتیجے اور پارٹی کے رکن پارلیمنٹ ابھیشیک بنرجی، آئی- پی اے سی سربراہ پرشانت کشور، اسمبلی کے سابق اسپیکر ومان بنرجی، فرہاد حکیم، اداکار سے رکن پارلیمنٹ بنے دیو، ریاست کے چیف سکریٹری الفان بندھواپادھیائے، ڈائریکٹر جنرل پولیس اور دیگر معزز شخصیات موجود تھیں۔
اس دوران اپوزیشن کا کوئی رکن موجود نہیں تھا۔ بی جے پی کے ریاستی صدر دلیپ گھوش اور کانگریس لیڈر ادھیر رنجن چودھری اور پردیپ بھٹا چاریہ کو تقریب میں شامل ہونے کے لئے دعوت نامہ بھی بھیجا گیا تھا لیکن وہ نہیں پہنچے۔
محترمہ بنرجی پہلی بار سال 2011 میں وزیراعلیٰ بنی تھیں، جب انہوں نے اس وقت کے بدھ دیو بھٹاچاریہ کی قیادت والے بایاں محاذ کو انتخاب میں شکست دی تھی اور اسی کے ساتھ کافی طویل عرصے سے ریاست میں بایاں محاذ کی حکومت کا خاتمہ ہوگیا۔ دوسری بار انہوں نے سال 2016 میں انتخاب میں 211 سیٹیں جیت کر اپنی پارٹی کی حکومت برقرار رکھی۔ حال ہی میں 2021 کے اسمبلی انتخابات میں محترمہ بنرجی نے 213 نشستوں پر کرشمائی جیت حاصل کی۔

وزیراعظم نے ممتا بنرجی کو مبارکباد دی

وزیراعظم نریندر مودی نے مغربی بنگال کی وزیراعلیٰ عہدے کا حلف لینے پر محترمہ ممتا بنرجی کو مبارکباد دی ہے ،وزیرعظم نے بدھ کو اپنے ٹوئٹ میں کہا ’’مغربی بنگال کی وزیراعلیٰ کا حلف لینے پر ممتا بنرجی کو مبارکباد‘‘ ترنمول کانگریس کی سربراہ محترمہ بنرجی نے اسمبلی انتخابات میں پاڑٹی کو ملی شاندار جیت کے بعد مسلسل تیسری بار وزیراعلیٰ کے عہدے کا حلف لیا۔