ہاپوڑ :(ایجنسی)
انتظامیہ امن و امان کو بہتر بنانے کے جتنے بھی دعوے کرے لیکن اتر پردیش میں کرائم پیشہ افراد کے حوصلے بلند ہیں۔ ہاپوڑ میں آج دن دہاڑے تین بدمعاشوں نے کیرانہ تاجر کی دکان میں گھس کر سات لاکھ روپے لوٹ لیے اور ہوا میں فائرنگ کرتے ہوئے فرار ہوگئے۔
ہاپوڑ دیہات تھانہ علاقہ کے محلہ اندرلوک میں بدمعاشوں نے ہول سیل کیرانہ تاجر سشیل کمار کی ٹانگ پر گولی مار کر تقریباً سات لاکھ روپے لوٹ لئے۔ تاجر سشیل کمار کو اسپتال میں داخل کرایا گیا ہے۔
دوپہر ڈھائی بجے کے قریب تاجر اپنی دکان پر گاہکوں کو سامان دے رہے تھے۔ اوپر ہی اس کا قیام ہے۔ اس دوران وہاں پہنچے تین نقاب پوش بدمعاشوں نے اپنے پستول کے زور پر تاجراور گاہکوں کو یرغمال بنا لیا۔ واردات کے بعد بدمعاش سات لاکھ لوٹ کر فرار ہونے لگے تو تاجر نے بدمعاشوں کو پکڑنے کے لیے شور مچایا، جس پر بدمعاشوں نے ان پر فائرنگ کردی۔
ٹانگ میں گولی لگنے سے تاجر سشیل زخمی ہو گیا۔ اس کے بعد بدمعاش ہوائی فائرنگ کرتے ہوئے فرار ہوگئے۔ واقعہ کے بعد تاجر موقع پر جمع ہوگئے۔ تین تھانوں کی پولیس بھی موقع پر پہنچ گئی۔ ایس پی دیپک بھوکر بھی موقع پر پہنچے اور لوگوں سے پوچھ گچھ کی۔ تاجروں نے برہمی کا اظہار کرتے ہوئے واقعہ کا انکشاف کرنے کا مطالبہ کیا۔
