نئی دہلی :(ایجنسی)
روس اور یوکرین کے درمیان جنگ جاری ہے۔ اس درمیان روس کے صدر ولادیمیر پوتن نے اپنے دشمن ممالک کی لسٹ کی منظوری دے دی ہے۔ اس لسٹ میں امریکہ، برطانیہ اور یوکرین سمیت 31 ممالک شامل ہیں۔ چین کی سرکاری میڈیا نے یہ دعویٰ کیا ہے۔
چین کے سرکاری میڈیا سی جی ٹی این نے اپنی رپورٹ میں دعویٰ کیا ہے کہ روسی حکومت نے دشمن ممالک کی فہرست کی منظوری دے دی ہے۔ اس فہرست میں امریکہ، برطانیہ، یوکرین، جاپان اور یورپی یونین کے رکن ممالک کے نام شامل ہیں۔ یورپی یونین میں 27 ممالک ہیں۔
روسی صدر یوکرین پر حملے کے لیے امریکہ سمیت مغربی ممالک کے نشانے پر ہیں۔ امریکہ اور مغربی ممالک نے معیشت کو نقصان پہنچانے کے مقصد سے روس پر کئی پابندیاں عائد کر رکھی ہیں۔