نفاذ کے اگلے ہی دن سپریم کورٹ نے فیکٹ چیک یونٹ کے نوٹیفکیشن پر پابندی لگا دی

نئی دہلی:سپریم کورٹ نے جمعرات کو مرکزی حکومت کے اس نوٹیفکیشن پر روک لگا دی، جس میں فیکٹ چیک یونٹ کو نافذ کرنے کا حکم جاری کیا گیا تھا۔ 20 مارچ کو، حکومت کی الیکٹرانکس اور آئی ٹی کی وزارت نے آئی ٹی (ترمیمی) ایکٹ کے تحت فیکٹ چیک یونٹ کے قوانین کو لاگو کرنے کے لیے ایک نوٹیفکیشن جاری کیا تھا۔ آئی ٹی ترمیمی ایکٹ 2023 کے قوانین کو بمبئی ہائی کورٹ میں چیلنج کیا گیا تھا۔ ایسے میں سپریم کورٹ نے بامبے ہائی کورٹ کے فیصلے تک فیکٹ چیک یونٹ کے نوٹیفکیشن پر پابندی لگانے کا حکم دیا ہے۔ حکومت نے سوشل میڈیا پر مواد کی نگرانی کے لیے آئی ٹی ترمیمی ایکٹ کے تحت فیکٹ چیک یونٹ تشکیل دیا تھا۔
فیکٹ چیک یونٹ کو یہ اختیار ملے
فیکٹ چیک یونٹ حکومت کی جانب سے مختلف سوشل میڈیا پلیٹ فارمز جیسے فیس بک، ایکس یا انسٹاگرام وغیرہ پر موجود مواد کی نگرانی کرے گا اور یہ یونٹ کسی بھی معلومات کو جعلی یا غلط قرار دے سکتا ہے۔ فیکٹ چیک یونٹ کے اعتراض کے بعد اس مواد یا پوسٹ کو سوشل میڈیا سے ہٹانا ہوگا اور اس کے یو آر ایل کو بھی انٹرنیٹ سے بلاک کرنا ہوگا۔ فیکٹ چیک یونٹ ایک نوڈل ایجنسی ہوگی۔ اس قانون کے خلاف ہائی کورٹ میں درخواست دائر کر دی گئی۔
اسٹینڈ اپ کامیڈین کنال کامرا، ایڈیٹرز گلڈ آف انڈیا، نیوز براڈکاسٹرز اینڈ ڈیجیٹل ایسوسی ایشن اور ایسوسی ایشن آف انڈین میگزینز نے آئی ٹی قوانین میں ترمیم کے خلاف بامبے ہائی کورٹ میں درخواست دائر کی تھی۔ درخواست میں آئی ٹی ترمیمی ایکٹ کے قواعد کو غیر آئینی اور بنیادی حقوق کی خلاف ورزی قرار دیا گیا۔ ایڈیٹرز گلڈ کا کہنا ہے کہ جعلی خبروں کا فیصلہ کرنے کا پورا اختیار حکومت کے ہاتھ میں آجائے گا جو میڈیا کی آزادی کے خلاف ہے۔ بامبے ہائی کورٹ کے تین ججوں جسٹس جی ایس پٹیل، جسٹس نیلا گوکھلے اور جسٹس چندورکر کی بنچ فیکٹ چیک یونٹ پر پابندی لگانے پر اتفاق رائے پر نہیں پہنچ سکی اور اس پر پابندی لگانے سے انکار کردیا۔ فیکٹ چیک یونٹ کیس ابھی بھی بامبے ہائی کورٹ میں زیر سماعت ہے۔ ہائی کورٹ سے راحت نہ ملنے پر درخواست گزاروں نے سپریم کورٹ سے رجوع کیا، جہاں سے اب انہیں راحت مل گئی ہے۔