نئی دہلی :
کورونا کے بڑھتے انفیکشن کے درمیان اروند کیجریوال حکومت نے ججوں کے بعد سرکاری بابوؤں کے لئے وی آئی پی انتظامات کیے ہیں۔ دہلی کی حکومت نے گزشتہ روز دہلی کے چار بڑے ہوٹلوں کو اسپتالوں سے لنک کرنے کا حکم دیا ہے تاکہ سرکاری عہدیداروں اور ان کے اہل خانہ کے افراد کا علاج کیا جاسکے۔ بتادیں کہ دہلی ہائی کورٹ نے ججوں کے لئے وی آئی پی انتظامات کرنے پر دہلی حکومت کو پہلے ہی پھٹکار لگاچکی ہے۔
دہلی حکومت نے وویک وہار میں ہوٹل جنجر ، شاہدرہ میں ہوٹل پارک پلازہ ، کڑکڑڈوما کے قریب ہوٹل لیلا امبیانس ، ہری نگر میں ہوٹل گولڈن انسوشیل کو سرکاری افسران اور ان کے اہل خانہ کے لئے ریزرو کیا ہے۔ منگل کو جاری حکم کے مطابق ان ہوٹلوں کو راجیو گاندھی سپراسپشلیٹی اسپتال اور دن دیال اپادھیائے اسپتال سے منسلک کیا جائے گا تاکہ دہلی سرکار، محکمہ صحت اور کارپویشن کے افسران اور ان کے اہل خانہ کاعلاج کیا جاسکے۔
دہلی سرکایر کے ذریعہ جاری کئے گئے حکم میں لکھا گیا ہے کہ راجیو گاندھی اسپتال اور دین دیال اپادھیائے اسپتال کے ڈائریکٹروں کو ہدایت دی جاتی ہے کہ وہ ریزرو کئے گئےہوٹلوں میں کووڈ پازیٹیو افسران اور ان کے پریوار والوں کے لیے طبی انتظامات مہیا کرائیں۔ ساتھ ہی اس حکم میں یہ بھی کہا گیا ہے کہ ریزرو کئے گئے ہوٹلوں میں دہلی سرکار کے کووڈ پازیٹیو افسران اور ان کے اہل خانہ کے فرد کوارنٹین بھی کر سکیں گے۔