نئی دہلی :(ایجنسی)
سابق مرکزی وزیر اور صحافی ایم جے اکبر پر 2018 میں کئی خواتین نے جنسی زیادتی کا الزام لگایا تھا۔ اب انہوں نے زی میڈیا کے بین الاقوامی نیوزچینل واین کے ذریعہ ایک بارپھر سے نیوز روم میں واپسی کی ہے ، حالانکہ کمپنی نے ابھی تک آفیشیل طور پر ان کی تقرری کااعلان نہیں کیا ہے ، لیکن ایم جے اکبر 16 اگست سے ہی کمپنی کی ادارتی میٹنگ میں حصہ لے رہے ہیں۔
واین چینل کے ایک ملازم نے نیوز لانڈری کو بتایا ، ’زی میڈیا کی کنٹرولنگ کمپنی ایسل گروپ کے مالک سبھاش چندرا نے خود ہی چینل کے سینئر ملازمین کو اگست کے دوسرے ہفتے میں اکبر سے تعارف کرایا تھا ۔
نام نہ ظاہر کرنے کی شرط پر ایک دوسرے صحافی بتاتے ہیں ’ گزشتہ ہفتہ دوپہر کی میٹنگ میں واین اور زی نیوز کے چیف ایڈیٹر سدھیر چودھری نے اسٹاف سے کہاکہ ایم جے اکبر آئندہ پیر سے صبح کی میٹنگ میں حصہ لیں گے ۔ ہمیں بتایا گیا کہ وہ بطور وائس پزیڈنٹ کمپنی جوائن کررہے ہیں ۔ ابھی تک وہ آن لائن ہی میٹنگ کررہے ہیں اور آفس نہیں آرہے ہیں ۔‘‘
صحافی نے آگے بتایاکہ ’ سدھیر چودھری نے ساتھ ہی کہاکہ اب سے صبح کی میٹنگ میں وہ اور سبھاش چندرا دونوں میٹنگ میں حصہ لیں گے ۔ اکبر کے جڑنے سے کچھ لوگ فکر مند ہیں ، خاص طور پر جونیئر اسٹاف ،حالانکہ وہ مخالفت نہیں کررہے ہیں لیکن سرگوشی کر رہے ہیں۔ ‘
ایک تیسرے صحافی نے بھی اکبر کی جوائنگ کی تصدیق کرتے ہوئے کہا ’ آفس میں لوگوں کو بتایا گیا ہے کہ اکبر اگلے ہفتہ سے میٹنگوں میں حصہ لینا شروع کردیں گے ،لیکن ابھی تک ان کے جوائن کرنے اور ان کے رول کے بارے میں کوئی آفیشیل ای میل نہیں آیا ہے ۔
واین کے عملے نے بتایا کہ ایم جے اکبر جوپہلے ٹیلی گراف، ایشین ایج اور سنڈے گارجین کے ایڈیٹر رہ چکے ہیں ، انہوں نے ابھی تک جتنی بھی ادارتی میٹنگ جوائن کی ہیں ، ان میں وہ کافی سرگرم رہے ہیں ، ساتھ ہی رپورٹس کو لے کر آئیڈیا بھی دیا ۔ چندرا اور چودھری ،جو عام طور پر صبح کی میٹنگوں میں شامل نہیں ہوتے تھے ، وہ بھی اس ہفتہ میٹنگ میں رہے ۔
بتادیں کہ ایم جے اکبر اور چندرا دونوں کا سیاسی تعلق بی جے پی سے رہاہے ، وہ راجیہ سبھا کے رکن ہیں، اکبر نے سال 2016 میں میڈیا مغل (سبھاش چندرا) کی سوانح عمری کااجرا کیا تھا۔
