کچھ حل نکالو ! کسان تحریک سے سڑکیں جام ہونے پر مرکز سے بولا سپریم کورٹ

نئی دہلی :(ایجنسی)

سپریم کورٹ نے تقریبا نو مہینے سے زیادہ وقت سے جاری کسان تحریک کی وجہ سے ٹریفک کی نقل و حرکت میں پڑنے والے خلل پر پیر کو ناراضگی ظاہر کی اور مرکزی حکومت، اترپردیش اور ہریانہ حکومت کو اس کا حل تلاش کرنے کے لئے کہا ہے ۔ جج سنجے کشن کول اور جج رشی کیش رائے پر مشتمل بنچ نے نوئیڈا کی باشندہ مونیکا اگروال کی عرضی پر سماعت کے دوران مرکز کو یہ یقینی بنانے کی ہدایت دی کہ دہلی سے نوئیڈا کے درمیان کی سڑک پر کوئی رکاوٹ نہ ہو۔

جج کول نے کہاکہ کسانوں کو مظاہرہ کا حق ہے ، لیکن سڑکوں کو غیرمعینہ مدت کے لئے بند نہیں کیا جاسکتا ہے۔ اس کا حل مرکزی حکومت اور متعلقہ ریاست کے ہاتھ میں ہے۔ خواہ وجہ کوئی بھی ہو، سڑکوں کو بلاک نہیں کیا جاسکتا ہے۔ عدالت نے کہا کہ مرکزی حکومت اس معاملے کا حل تلاش کرکے عدالت کو رپورٹ کرے۔ اس کے ساتھ ہی مرکزی حکومت اور یوپی سرکار کو دہفتوں میں حل نکالنے کیلئے کہا ہے ۔

اترپردیش حکومت کے وکیل نے عدالت کے سامنے کہا کہ مظاہرین کسانوں سے بات کرکے انہیں سڑک خالی کرنے کے لئے سمجھانے کی کوشش کی جارہی ہے۔ ریاستی حکومت مظاہرین کو یہ سمجھانے کی کوشش بھی کررہی ہے کہ ان کا سڑک روکنا عدالت کے حکم کی خلاف ورزی ہے۔

عرضی گزار کا کہنا ہے کہ سڑکوں کو خالی رکھنے کے عدالت کی با ر بار کی ہدایات کے باوجود بھی اس پر عملد رآمد نہیں کیا گیا ہے۔’سنگل مدر‘ اور کئی طبی مسائل میں مبتلا ہونے کی وجہ سے ان کے لئے نوئیدا سے دہلی آنا ایک برے خواب کی طرح ہوگیا ہے ۔ حالانکہ عرضی گزاروں کی غیرموجودگی کی وجہ سے اب سماعت ملتوی کردی گئی ۔ عدالت نے معاملہ کی اگلی سماعت کے لئے 20 ستمبر کی تاریخ مقرر کی ہے۔