تحریک : سوتک بسواس
غیر سرکاری تحقیقی ادارے پیو ریسرچ سینٹر کی تازہ تحقیق کے مطابق بھارت میں ہر مذہب کے ماننے والوں کی آبادی کی شرحِ پیدائش میں کمی واقع ہوئی ہے۔ اس کے نتیجے میں سنہ 1951 کی مردم شماری سے لے کر اب تک بھارت میں مختلف مذاہب کے ماننے والوں کی آبادی کے تناسب میں کوئی خاص فرق نہیں آیا ہے۔
ایک ارب بیس کروڑ کی آبادی کے دو بڑے گروہ، ہندو اور مسلمان، بھارت کی آبادی کا 94 فیصد بنتے ہیں۔ جبکہ مسیحی، سکھ، بدھ مت کے ماننے والےاور جین مذہب کے پیروکار کل ملا کر بھارت کی آبادی کا چھ فیصد بنتے ہیں۔
پیو ریسرچ نے بھارت کے ہر دہائی پر ہونے والے اعداد و شمار اور نیشنل فیملی ہیلتھ سروے کی معلومات کی بنیاد پر اس بات کا جائزہ لیا کہ ملک میں مختلف مذاہب کے پیروکاروں کی آبادی کے تناسب میں کیا تبدیلی آئی ہے، اور اس تبدیلی کے کیا اسباب ہیں۔
سنہ1947 کے بٹوارے،جب محکوم بھارت کو ایک ہندو اکثریتی ملک بھارت اور مسلم اکثریتی ملک پاکستان میں تقسیم کیا گیا تھا، سے لے کر اب تک بھارت کی آبادی میں تین گنا اضافہ ہو چکا ہے۔
سنہ 1951 کی مردم شماری کے وقت بھارت کی آبادی 36 کروڑ تھی جو سنہ 2011 کی مردم شماری کے مطابق، ایک ارب، بیس کروڑ سے زیادہ ہو چکی ہے۔ (آزاد بھارت میں پہلی مردم شماری سنہ 1951 میں ہوئی تھی ا ور آخری مردم شماری سنہ 2011 میں ہوئی تھی۔ پیو ریسرچ سینٹر کی تحقیق کے مطابق اس عرصے میں ہر مذہب کے پیروکاروں کی آبادی میں اضافہ ہوا ہے۔
ہندوؤں کی آبادی 30 کروڑ 40 لاکھ سے بڑھ کر 96 کروڑ 60 لاکھ ہو گئی ہے۔ اسی عرصے میں مسلمانوں کی آبادی ساڑھے تین کروڑ سے 17 کروڑ 20 لاکھ ہو چکی ہے۔ اور مسیحیوں کی آبادی 80 لاکھ سے بڑھ کر دو کروڑ اسی لاکھ تک پہنچ چکی ہے۔
مختلف مذاہب کا آبادی میں تناسب
سنہ 2011 کی مردم شماری میں بھارت کی ایک ارب بیس کروڑ آبادی میں 79.8 فیصد ہندو ہیں۔ دنیا کے 94 فیصد ہندو انڈیا میں رہتے ہیں۔
مسلمانوں کی تعداد انڈیا کی آبادی کا 14.2 فیصد ہے۔ انڈیا دنیا کی سب سے بڑی مسلم آبادیوں میں سے ایک ملک ہے۔ صرف انڈونیشیا میں مسلمان آبادی کی تعداد انڈیا کے مسلمانوں کی تعداد سے زیادہ ہے۔
مسیحی، سکھ، بدھ مت کے ماننے والے اور جین مت کے پیروکار کل ملا کر بھارت کی آبادی کا چھ فیصد حصہ بنتے ہیں۔
سنہ 2011 کی مردم شماری میں صرف تیس ہزار افراد نے اپنے آپ کو لادین بتایا۔
تقریبا 80 لاکھ افراد نے کہا کہ ان کا چھ بڑے مذہبی گروہوں میں سے کسی سے تعلق نہیں ہے۔
بھارت میں 83 چھوٹے مذہبی گروہ تھے اور ہر ایک کے کم از کم 100 پیروکار تھے۔
بھارت کی آبادی میں ہر ماہ تقریباً دس لاکھ افراد کا اضافہ ہوتا ہے، جس کا مطلب ہے کہ اس کی آبادی سنہ 2030 تک آج کے سب سے زیادہ آبادی والے ملک چین سے بڑھ جائے گی۔
(سورس: مردم شماری سنہ 2011، پیو ریسرچ سینٹر)
بڑے مذہبی گروہوں میں اب بھی مسلمانوں میں سب سے زیادہ شرح پیدائش (2015 میں 2.6 بچے فی عورت) ہے۔ اس کے بعد ہندوؤں کی شرح پیدائش شرح (2.1) بنتی ہے۔ جین برادری میں سب سے کم شرح پیدائش یعنی 1.2 فی عورت ہے۔
تحقیق کے مطابق عمومی طور پر شرح پیدائش کا تناسب بڑی حد تک وہی ہے جو سنہ 1992 میں تھا، جب مسلمانوں میں سب سے زیادہ شرح پیدائش تھی (4.4) اس کے بعد ہندو (3.3) تھے۔
محققین کہتے ہیں کہ ’بھارت کے مذہبی گروہوں کے درمیان بچے پیدا کرنے میں فرق عام طور پر پہلے کی نسبت بہت کم ہے۔‘
آبادی میں اضافے کی سست روی بھارت کے اقلیتی گروہوں میں زیادہ نمایاں نظر آتی ہے جن میں ابتدائی دہائیوں میں شرح پیدائش ہندوؤں کی نسبت کہیں زیادہ تھی۔
پیو سینٹر میں امورِ مذاہب کی محقق، اسٹیفنی کرامر کہتی ہیں کہ مسلمانوں کی ایک نسل میں 25 سال سے کم عمر کے دو بچوں کی پیدائش میں کمی قابل ذکر ہے۔
سنہ 1990 کی دہائی کے اوائل میں بھارت کی خواتین کے بچوں کی پیدائش کی تعداد اوسطاً 3.4 فی عورت سے سنہ 2015 میں 2.2 فی عورت رہ گئی تھی۔ اسی طرح اسی عرصے میں مسلمانوں میں شرح پیدائش 4.4 فی عورت سے 2.6 فی عورت سے بھی زیادہ کم ہو گئی۔
ان ساٹھ برسوں میں بھارت کی آبادی میں مسلمانوں کا حصہ چار فیصد بڑھا، جبکہ ہندوؤں کا حصہ تقریباً اتنے ہی تناسب سے کم ہوا۔ جبکہ باقی دیگر مذاہب میں اضافے کا رجحان مستحکم رہا۔
اسٹیفنی کرامر نے بی بی سی کو بتایا کہ ‘ڈیموگرافک تبدیلی کی معمولی مقدار کو اس حقیقت سے سمجھایا جا سکتا ہے کہ مسلم خواتین نے کم از کم حال ہی میں دیگر انڈین خواتین کے مقابلے میں اوسطاً زیادہ بچے پیدا کیے ہیں۔
تحقیق کے مطابق، خاندانی سائز بہت سے عوامل سے متاثر ہوتے ہیں، جس کی وجہ سے ‘یہ بتانا ناممکن ہے کہ آیا صرف مذہبی وابستگی شرح پیدائش پر اثر انداز ہوتی ہے۔’بہت سے ممالک کے برعکس، بھارت میں آبادیاتی تبدیلی پر ہجرت یا مذہبی تبدیلی کے اثرات ‘نہ ہونے کے برابر‘ہیں۔
اب تک بھارت میں مذہبی آبادی کی معمولی سی تبدیلی کا ‘سب سے بڑا سبب ’شرح پیدائش‘ رہی ہے۔
آبادی میں اضافہ اس حقیقت کی وجہ سے بھی ہوا کہ ایسے اوسطاً جوان گروہ جن میں نوجوان عورتوں کی تعداد قدرے اوسطاً بوڑھے گروہوں کی نسبت زیادہ تھی وہ ‘بچے پیدا کرنے کے اپنے ابتدائی برسوں میں جلد داخل ہوتی ہیں اور اس کے نتیجے میں بوڑھی آبادی کے مقابلے میں ان کی تعداد میں تیزی سے اضافہ ہوتا ہے۔
اس تحقیق کے مطابق، سنہ 2020 تک ہندوؤں کی اوسط عمر 29 ہے، جبکہ مسلمانوں کی 24 اور عیسائیوں کی 31 ہے۔
بھارت میں آبادی میں اضافے کے دیگر اسباب میں خواتین میں تعلیم کی سطح (اعلیٰ تعلیم یافتہ خواتین اکثر دیر سے شادی کرتی ہیں اور کم تعلیم یافتہ خواتین کے مقابلے میں ان کا پہلا بچہ بعد میں ہوتا ہے) اور دولت (غریب خواتین زیادہ بچے پیدا کرتی ہیں تاکہ وہ گھریلو کام میں حصہ ڈال سکیں اور آمدنی میں اضافہ کرسکیں)۔
یہ نتائج مکمل طور پر حیران کن نہیں ہیں کیونکہ حالیہ دہائیوں میں بھارت کی مجموعی شرح پیدائش تیزی سے کم ہو رہی ہے۔ اوسطاً ایک عام انڈین عورت کی شرح پیدائیش2.2 ہے۔
یہ امریکہ (جہاں 1.6 بچے فی عورت شرح پیدائش ہے) جیسے ممالک کی شرحوں سے زیادہ ہے، لیکن خود بھارت کی سنہ 1992 میں (3.4) یا سنہ 1950 (5.9) کی شرح پیدائش سے کم ہے۔
اس تحقیق کی ایک دلچسپ بات یہ ہے کہ صرف چند ہندوستانی ایسے ہیں جو کہتے ہیں کہ ان کا کسی مذہب سے تعلق نہیں ہے۔ جبکہ عالمی سطح پر مذہب کے خانے کو خالی چھوڑنے والوں کی تعداد – مسیحیوں اور مسلمانوں کے بعد – تیسرے نمبر آتی ہے۔
اسٹیفنی کرامر کا کہنا ہے کہ ‘اس لیے یہ دلچسپی کی بات ہے کہ اتنے بڑے ملک میں مذہب سے لاتعلق افراد بہت ہی کم تعداد میں ہیں۔
اس کے علاوہ کئی مذہبی گروہ بھارت میں ‘غیر معمولی حد تک مرکوز ہیں، دنیا بھر کی ہندوؤں کی کل آبادی کا 94 فیصد حصہ بھارت میں رہتا ہے، اسی طرح جینوں کی اکثریت اور 90 فیصد سے زیادہ سکھ بھی بھارت میں رہتے ہیں۔ دنیا میں زیادہ تر سکھ صرف ایک بھارت ریاست پنجاب میں رہتے ہیں۔
اگربھارت کا موازنہ چین سے کریں، جس کی آبادی بھارت سے زیادہ ہے، دنیا کے بدھ مت کے پیروکاروں کی نصف آبادی چین میں رہتی ہے اور سب سے زیادہ لا دین افراد کی آبادی بھی چین میں رہتی ہے۔
لیکن چین میں ‘کسی بھی بڑے مذہبی گروہ کی 90 فیصد آبادی جیسی صورت نہیں ہے۔ اسٹیفنی کرامر کہتی ہیں کہ ‘واقعی کوئی ایسا ملک نہیں جو انڈیا جیسا مذہبی منظر نامہ پیش کرتا ہو۔
بشکریہ : سوتک بسواس ، بی بی سی )
