لکھیم پور تشدد :اجے مشرا کی کرسی نہیں جائے گی،پارٹی کارروائی کے حق میں نہیں

لکھیم پور کھیری ( ایجنسی)

لکھیم پور تشدد معاملےمیں اپوزیشن اور کسانوں کے دباؤ کے باوجود بی جے پی فی الحال مرکزی وزیر مملکت برائے داخلہ اجے مشرا کے خلاف کارروائی کرنے کے موڈ میں نہیں ہے۔ ذرائع کے مطابق وزیر اعظم نریندر مودی پولیس جانچ ختم ہونے کے بعد اس پر فیصلہ لیں گے۔

اجے مشرا کے بیٹے آشیش مشرا کو پولیس حراست میں بھیج دیا گیا ہے۔ ساتھ ہی ، آشیش کے والد اس تشدد میں اپنے بیٹے کے ملوث ہونے سے انکار کر رہے ہیں۔ اجے مشرا اس کیس سے الگ پارٹی اور سرکار کے پروگرام میں شامل ہو رہے ہیں ۔

بی جے پی ذرائع نے انڈین ایکسپریس کو بتایا کہ پارٹی پولیس جانچ کا انتظار کر رہی ہے۔ جانچ پوری کرنے کے بعد وزیر اعظم نریندر مودی اجے مشرا پر فیصلہ لیں گے۔ انہوں نے کہا کہ اگر کوئی ثبوت ہے جو اس واقعے میں اس کے ملوث ہونے کو ثابت کرتا ہے تو اعلیٰ قیادت فیصلہ کرے گی۔ پارٹی صرف اس وجہ سے دباؤ میں نہیں آئے گی کہ اپوزیشن ان کے استعفیٰ کا مطالبہ کر رہی ہے۔

ذرائع نے بتایا کہ بی جے پی نے اندازہ لگایا ہے کہ اگلے سال ہونے والے یوپی اسمبلی انتخابات میں اس واقعے کا کوئی بڑا اثر نہیں پڑے گا۔ بی جے پی لیڈر نے کہا کہ ’’حالانکہ جانچ کی پیش رفت کی بنیاد پر پارٹی حتمی فیصلہ لے گی۔‘‘ ذرائع نے یہ بھی بتایا کہ ایس آئی ٹی نے آشیش کے لیے اس معاملے سے متعلق کئی سوالات تیار کئے تھے، لیکن ملزم نے زیادہ تر سوالات کا جواب نہیں دیا ۔ ریاستی سرکار کے ایک افسر نے کہاکہ ’’ آشیش مشرا نے اتوار کو 12گھنٹے کی پوچھ گچھ کے دوران تقریباً 40 سوالات کے جواب دئے ۔‘‘

ذرائع نے بتایا کہ ایس آئی ٹی واقعے کے گواہوں کے ساتھ آشیش کا سامنا بھی کرائے گی ۔ اس کے بعد مجرمانہ سازش کے الزامات پر اس سے پوچھ گچھ کرے گی۔ ایس آئی ٹی ان لوگوں کی شناخت بھی کرنا چاہتی ہے جو کسانوں کو ٹکر مارنے والی تین گاڑیوں میں سوار تھے۔ اس واقعہ میں چار کسانوں کی موت ہوگئی تھی۔ اس کے بعد ہوئے تشدد میں وزیر کے ڈرائیور اور دو بی جے پی کارکنوں کی موت ہو گئی تھی۔ مرنے والوں میں ایک صحافی بھی شامل ہے ۔

ایک سینئر افسر نے بتایا کہ لکھیم پور میں اس وقت موجود پولیس اہلکاروں سے بھی پوچھ گچھ کی جا رہی ہے۔ پیر کو اس معاملے کی ویڈیو کانفرنسنگ کے ذریعے سماعت ہوئی۔ پولیس نے سماعت کے دوران کہا کہ ثبوت اکٹھا کرنے اور ملزم سے مزید تفتیش کے لیے حراست کی ضرورت ہے۔

عدالت نے دونوں فریقین کو سننے کے بعد آشیش مشرا کو تین دن کی پولیس حراست میں بھیجنے کا حکم دیا۔ عدالت نے ملزم کے وکلاء کو دور سے تفتیش دیکھنے کی اجازت دی ہے تاکہ کوئی پریشانی نہ ہو۔ آشیش مشرا کے وکیل اودھیش کمار سنگھ نے کہا کہ پولیس نے اس بنیاد پر ریمانڈ مانگ کی تھی کہ میرا موکل تحقیقات میں تعاون نہیں کر رہا تھا۔ ہم نے اس پر اعتراض کیا کیونکہ ایجنسی نے میرے موکل کے خلاف کوئی ثبوت پیش نہیں کیا تھا۔