نئی دہلی:(ایجنسی)
مرکزی حکومت نے تہواروں کے دوران گھریلو ہوائی سفرکرنے والوں کو خوشخبری دی ہے۔ دراصل سول ایوی ایشن کی وزارت نے کورونا وائرس کی وبا کے بعد گھریلو پروازوں پر عائد پابندی میں راحت دی ہے۔ وزارت کے حکم کے مطابق اب 18 اکتوبر 2021 سے گھریلو کمرشیل پروازوں میں مسافروں کی گنجائش کو لیکر نافذ پابندیاں ہٹا دی جائیں گی۔ آسان الفاظ میں اگر کہا جائے تو اب گھریلو کمرشل پروازیں اپنی پوری صلاحیت کے ساتھ اڑ سکیں گی۔
ستمبر 2021 میں مرکزی حکومت نے گھریلو پروازوں کی مسافروں کی گنجائش 72.5 فیصد سے بڑھا کر 85 فیصد کردی تجی۔ اب اگلے ہفتے سے پوری صلاحیت کے ساتھ ملک میں پروازیں چلائی جائیں گی۔ پروازوں کو پوری صلاحیت کے ساتھ کام کرنے کی اجازت دینے کے ساتھ ساتھ وزارت نے ایئر لائنز اور ہوائی اڈے کے آپریٹرز سے کہا ہے کہ وہ کووڈ 19 کے پھیلاؤ کو روکنے کے لیے تمام اقدامات کو یقینی بنائیں۔ اس کے علاوہ سفر کے دوران کووڈ پروٹوکول پر سختی سے عمل کرایا جانا چاہیے۔
ستمبر 2021 کے پہلے چھ دنوں میں 2 لاکھ افراد نے روزانہ ہوائی سفر کیا۔ یہی نہیں اسی طرح کے اعداد و شمار اگست 2021 میں بھی دیکھے گئے۔ اگست میں ملک میں 57،498 پروازوں میں 65،26،753 افراد نے ہوائی سفر کیا جو کہ جولائی 2021 کے مقابلے میں 33 فیصد زیادہ ہے۔ کووڈ 19 کے معاملات میں کمی کے بعد ،مرکزی حکومت نے اگست سے ہوائی سفر کے قوانین میں نرمی کا اعلان کیا تھا۔ وہیں مرکزی حکومت نے 21 جون اور 13 اگست 2021 کو گھریلو پروازوں کے کرائے میں اضافے کا بھی اعلان کیا ہے۔
مرکزی حکومت نے ستمبر 2021 میں ایئرلائنز کو ایک بڑی راحت دیتے ہوئے مہینے میں 15 دن کا کرایہ طے کرنے کی چھوٹ دی تھی۔ باقی 15 دنوں کے لیے انہیں حکومت کی طرف سے مقرر کردہ پرائس بینڈ کے مطابق کرایہ لینا پڑے گا۔ کرایے کے پرائس بینڈ کے تحت حکومت اب تک سب سے کم اور سب سے زیادہ کرایہ کی حد مقرر کر رہی تھی لیکن اب اس میں نرمی کر دی گئی ہے۔ آپ کو بتادیں کہ کورونا وائرس وبا کی وجہ سے ہوا بازی کا شعبہ بری طرح متاثر ہوا ہے۔ سال 2020 کے دوران ایئر لائنز کا آپریشن مکمل طور پر بند ہو گیا تھا۔ کئی ماہ تک سروس بند رہنے کے بعد اندرون ملک پروازیں شروع ہوئیں تاہم مسافروں کی تعداد 50 فیصد رہ گئی تھی۔
