لکھنؤ :(ایجنسی)
اکھلیش یادو اس بار اتحاد کے گلدستے کے ساتھ یوگی آدتیہ ناتھ کو سخت چیلنج دے رہے ہیں۔ لیکن الگ الگ پارٹیوں کو جوڑنے کی کوشش آسان ثابت نہیں ہو رہی ہے۔ سوال یہ ہے کہ کیا اکھلیش کا گلدستہ الیکشن تک کھلتا رہے گا یا مرجھا جائے گا؟ درحقیقت یوپی میں اکھلیش یادو بلاشبہ 300 یونٹ بجلی مفت فراہم کرنے کے وعدے کے ساتھ ووٹروں کو راغب کرنے کی کوشش کر رہے ہیں، لیکن ان کے اپنے اتحادی کرسی کی دوڑ میں اکھلیش کو کرنٹ دے رہے ہیں۔
کئی سیٹوں پر اتحاد میں آپس میں تکرار
ایسا ہی تکرار ہردوئی کی سنڈیلا سیٹ پر دیکھا گیا جہاں ایس پی کی اتحادی سہیل دیو بھارتیہ سماج پارٹی نے ایس پی کے ٹکٹوں کے اعلان سے پہلے ہی سنیل آرکاونشی کو میدان میں اتاردیا۔ ساتھ ہی اکھلیش نے ریتا سنگھ کو حلف دلایا اور ٹکٹ دینے کا اعلان کیا۔ بجنور صدر سیٹ پر بھی ایسا ہی تناؤ دیکھا جا رہا ہے، جہاں جینت چودھری نے ڈاکٹر نیرج چودھری کو ہٹا دیا اور ایس پی نے ڈاکٹر رمیش تومر کو ٹکٹ دیا۔ اس سے پہلے متھرا سیٹ پر بھی ایسی ہی صورتحال پیدا ہوئی تھی جسے حل کر دیا گیا تھا۔ اتنا ہی نہیں جاٹ مہاسبھا بھی کم ٹکٹ ملنے سے ناراض ہے۔ مراد آباد میں ٹکٹ کٹنے پر حاجی اکرام قریشی اور حاجی رضوان نے بغاوت کر دی ہے۔
اپرنا یادو کے جانے سے اکھلیش کو بھی جھٹکا لگا
انتخابی موسم میں ہی ملائم کی چھوٹی بہو اپرنا یادو اکھلیش کا ساتھ چھوڑ کر بی جے پی کیمپ میں چلی گئیں۔ بی جے پی میں شامل ہونے کے بعد اپرنا نے کہا کہ بی جے پی میں راشٹر واد کی باتیں ہوتی ہیں جو مجھے سب سے زیادہ متاثر کرتی ہیں۔ کینٹ میں ایس پی سے ٹکٹ نہ ملنے کے سوال پر انہوں نے کہا کہ کیا مجھے ایس پی میں ٹکٹ ملنے سے کوئی روک سکتا ہے؟ اس کے ساتھ ہی ایس پی سرپرست ملائم سنگھ یادو کے ساڑھوپرمود گپتا بھی بی جے پی میں شامل ہو گئے ہیں۔ وہیں بھیم آرمی کے چندر شیکھر نے بھی اکھلیش کو جھٹکا دیا ہے۔ چندر شیکھر سماجک پریورتن مورچہ بنا کر 402 سیٹوں پر امیدوار کھڑے کرنے کا منصوبہ بنا رہے ہیں۔ اس سے اپوزیشن کے ووٹوں کے ٹوٹنے کا خطرہ بڑھ گیا ہے۔ تاہم چندر شیکھر نے اکھلیش کے خلاف امیدوار کھڑا نہ کرنے کا اعلان کیا ہے۔
