‘نیا بہار’: پلاس سے اطہر کی انگلیاں ،کان کاٹے، گرم سلاخ سے داغا،سینے پر کودے،جان لے لی

یہ خبر آچکی ہے ،پڑھ کر آگے بھی بڑھ گیے ہیں مگر اس کے تدارک پر غور اس لیے بھی نہیں کرتے کہ مارے جانے والے زیادہ تر غریب طبقہ سے تعلق رکھتے ہیں ـایک بار یہ رپورٹ اور پڑھ لیجیے ،تاکہ معلوم ہوسکے کہ اب بہار میں بھی لنچنگ کی شروعات ہوگئی ہے ـ بہار کے نوادہ ضلع میں لنچنگ یا ہجومی تشدد کا ایک ہولناک واقعہ پیش آیا۔ چوری کے الزام میں کپڑا فروش محمد اطہر حسین کو بے رحمی سے مار مار کر قتل کر دیا گیا۔ حملہ آوروں نے پلاس سے متاثرہ کے کان اور انگلیاں کاٹ دیں، اسے لوہے کی گرم سلاخ سے داغ دیا، اس کے اعضاء توڑ دیے اور اس کی شرم گاہ پر غیر انسانی تشدد کیا۔ اسے اسپتال میں داخل کرایا گیا لیکن جمعہ کی دیر رات علاج کے دوران اس کی موت ہوگئی۔ اس واقعہ نے ریاست میں ہجومی تشدد اور فرقہ وارانہ کشیدگی پر سنگین سوالات کھڑے کردیئے ہیں۔
نالندہ ضلع کے گاؤں گگن دیوان کے رہنے والے محمد اطہر حسین نے سائیکل پر کپڑے بیچ کر اپنے خاندان کی کفالت کی۔ وہ باروئی گاؤں میں اپنے سسرال کے ساتھ بھی جزوی طور پر رہتا تھا۔ یہ واقعہ 5 دسمبر کو اس وقت پیش آیا جب وہ روہ تھانہ علاقے کے بھٹاپر گاؤں سے گزر رہے تھے۔ ان کے بھائی محمد شکیب عالم کے مطابق اطہر نے اپنی سائیکل پنکچر ہونے پر قریبی پنکچر کی دکان پر گیا۔ وہاں موجود لوگوں نے مبینہ طور پر اس کا نام اور پیشہ پوچھا اور جیسے ہی اس نے اپنا نام محمد اطہر حسین بتایا تو حملہ شروع ہو گیا۔
متاثر کے اہل خانہ کا الزام:متاثرہ شخص کے ہسپتال کے بیان اور ایک ویڈیو میں، اطہر حسین نے بتایا کہ حملہ آوروں نے پہلے اسے اس کی سائیکل سے کھینچ لیا،18000 روپے لوٹ لیے۔ ہجوم بڑھ کر 15-20 افراد تک پہنچ گیا۔ ہاتھ پاؤں باندھ کر ایک کمرے میں بند کر دیا ،اسے اینٹوں، لاٹھیوں اور سلاخوں سے مارا۔ ویڈیو میں، اس نے اپنی تکلیفوں کا ذکر کرتے ہوئے کہا، "انہوں نے پلاس سے میرے کانوں اور انگلیوں کے سرے کو کاٹ دیا، میرے جسم کو گرم سلاخ سے جلا یا، جس سے جلد اکھڑ گئی ،۔ انہوں نے میرے کپڑے اتار دیے، میری شرم گاہ پر پیٹرول ڈالا، اور پھر میرے سینے پر چڑھ گئے، مجھے کچلتے رہے یہاں تک کہ میرے منہ سے خون بہنے لگا۔” کچھ رپورٹس میں یہ بھی بتایا گیا ہے کہ حملہ آوروں نے اس پر پٹرول چھڑک کر آگ لگانے کی کوشش کی اور اس کے پرائیویٹ پارٹس کو بجلی کے جھٹکے دے کر تشدد کا نشانہ بنایا۔ تاہم سرکاری طور پر اس کی تصدیق نہیں کی گئی ہے۔
اطہر کی اہلیہ شبنم پروین نے 6 دسمبر کو بھٹاپر گاؤں کے 10 نامی اور کچھ نامعلوم افراد کے خلاف ایف آئی آر درج کرائی۔ شکایت میں کہا گیا کہ شوہر کو چوری کے جھوٹے الزام میں پکڑا گیا، باندھ کر بے دردی سے پیٹا گیا، گرم سلاخ سے جلایا گیا، اس کا ہاتھ توڑ دیا گیا، اس کے کان کو چمٹا سے کاٹا گیا اور دیگر طریقوں سے تشدد کا نشانہ بنایا گیا۔الزام ہے کہ جب اطہر کی بیوی اپنے بھائیوں کے ساتھ گاؤں پہنچی تو گاؤں والوں نے انہیں دھمکیاں بھی دیں اور بدسلوکی کی۔ایف آئی آر تعزیرات ہند کی مختلف دفعات کے تحت درج کی گئی تھی، جس میں غیر قانونی اجتماع، ہنگامہ آرائی، شدید چوٹ پہنچانا، خطرناک ہتھیاروں کا استعمال، اور بعد میں موت کے بعد قتل کی دفعہ 303(2) کا اضافہ کیا گیا۔
ملزم نے بھی کی شکایت درج کرائی 
دوسری جانب، ایک ملزم سکندر یادیو نے اطہر پر رات 10:15 کے قریب اپنے گھر میں چوری کا الزام عائد کرتے ہوئے کراس شکایت درج کرائی۔ شکایت میں سونے کی چوڑیاں، منگل سوتر، چاندی کی پٹی اور پیتل کے برتنوں کی چوری کا دعویٰ کیا گیا تھا۔ پولیس ذرائع کے مطابق روہ پولیس 112 کی ایمرجنسی کال پر رات 2:30 بجے کے قریب گاؤں پہنچی اور شدید زخمی اطہر کو بچا لیا۔ دونوں فریقین کو تھانے لے جایا گیا۔
دی انڈین ایکسپریس کی ایک رپورٹ کے مطابق،نوادہ کے سپرنٹنڈنٹ آف پولیس ابھینو دھیمان نے بتایا، صدر ایس ڈی پی او کی قیادت میں ایک خصوصی ٹیم تشکیل دی گئی تھی۔ چار ملزمان کو 24 گھنٹوں کے اندر اور چار مزید کو 13 دسمبر تک گرفتار کر لیا گیا۔ کل آٹھ افراد کو یا تو گرفتار کیا گیا یا حراست میں لیا گیا۔ باقی ملزمان کی تلاش جاری ہے۔یہ معاملہ امن و امان پر سوال اٹھاتا ہے اور معاشرے میں پھیلتی نفرت کی ایک خطرناک مثال قائم کرتا ہے۔ پولیس کی تفتیش جاری ہے تاہم متاثرہ خاندان انصاف کا مطالبہ کر رہا ہے۔ستیہ ہندی کے ان پٹ کے ساتھ