بھوپال:
مدھیہ پردیش پولیس نے وزیر اعظم نریندر مودی اور مرکزی خواتین و اطفال بہبود وزیر اسمرتی ایرانی کے خلاف سوشل میڈیا پر مبینہ طور سے قابل اعتراض تبصرہ کرنے کے معاملے میں ایک شخص کو اجین سے گرفتار کیا ہے ۔
بھارتیہ جنتا پارٹی ( بی جے پی ) کے ایک مقامی لیڈر کی شکایت پر ہفتہ کو یہ کارروائی کی گئی۔ کھچارود پولیس تھانہ کے انچارج رام کشور سنگھاوت نے اتوار کو بتایاکہ بی جے پی کے کھچارود ڈویزن صدر چیتن شرما نے تھانہ میں شکایت درج کرائی تھی کہ اوکیا جاگیر گاؤں میں رہنے والے گووردھن ناگر (28) نے سوشل میڈیا پر وزیر اعظم نریندر مودی اور مرکزی وزیر اسمرتی ایرانی کے خلاف قابل اعتراض تبصرہ کیا ہے ۔
انہوں نے کہاکہ اس شکایت پر کارروائی کرتے ہوئے پولیس نے انفارمیشن اینڈ ٹیکنالوجی قانون کے تحت گووردھن ناگر کو ہفتہ کو گرفتار کیا اور بعد میں ضمانت پر چھوڑ دیا، سنگھاوت نے بتایا کہ اس کے خلاف انفارمیشن اینڈ ٹیکنالوجی قانون کے تحت معاملہ درج کیا گیا ہے اور تفصیلی جانچ جاری ہے ۔
