جو بھارتیہ جنتا پارٹی (بی جے پی) انتہائی ضروری نظر آ رہا اس پر بہار میں بی جے پی کے اتحادی حکومت کے سربراہ کی رائے بالکل مختلف ہے۔ بی جے پی کے ساتھ اتحاد میں حکومت چلا نے والے بہار کے وزیر اعلیٰ نتیش کمار نے کل آبادی کو کنٹرول کرنے کے لئے ایک قانون بنانے کے مطالبے کو یہ کہتے ہوئے مسترد کر دیا کہ اس کے لئے کسی قانون کی ضرورت نہیں ہے۔
بی جے پی لیڈر اور نائب وزیر اعلی تارکشور پرساد اور وزیر صحت منگل پانڈے کی موجودگی میں صحافیوں سے بات کرتے ہوئے وزیر اعلی نتیش کمار نے کہا کہ آبادی کنٹرول کرنے کے لیے کسی قانون کی ضرورت نہیں ہے۔ انہوں نے کہا کہ قانون کی بجائے خواتین کی تعلیم اسے مؤثر طریقے سے روکنے کا سب سے طاقتور طریقہ ہے۔
بہار میں خواتین کو تعلیم دے کر آبادی میں اضافے کو روکنے میں کامیاب ہونے کا دعویٰ کرتے ہوئے وزیر اعلیٰ نے کہا کہ ان کی حکومت اس سمت میں آگے بڑھ رہی ہے اور اس پر سنجیدگی سے کام بھی کر رہی ہے۔
واضح رہے اتر پردیش حکومت نے آبادی کنٹرول کرنے کے لئے پہل کر دی ہے اور اس کے بعد بی جے پی کے اقتدار والی ریاستوں کے حکمران نے بھی اس پر عمل کرنے سے متعلق بیانات دئے ہیں ۔ ماہرین کی رائے بھی وہی ہے جو نتیش کمار کی رائے ہے کہ تعلیم اور بنیادی سہولیات دینے سے جو بیداری پیدا ہو تی ہے اس سے ہی آبادی کنٹرول ہو جائے گی۔ واضح رہے چین میں ایک بچہ کے قانون کے بعد اس میں پہلے نرمی کر کے ایک خاندان میں دو بچے اور اب تین کی اجازت دے دی گئی ہے۔
