نئی دہلی :
جنتر منتر پر ایک خاص طبقہ کے خلاف متنازع نعرہ بازی کے الزام میں گرفتار بی جے پی کے سابق ترجمان اشونی اپادھیائے کو آج اس وقت بڑی راحت ملی جب دہلی کی ایک ذیلی عدالت نے 50 ہزار کے مچلکے پر انھیں ضمانت دینے کا فیصلہ سنایا۔ بی جے پی لیڈر اشونی اپادھیائے سمیت چھ لوگوں کو منگل کے روز دہلی پولیس نے گرفتار کیا تھا اور کہا تھا کہ ’’جنتر منتر پر مظاہرہ کے دوران مسلم مخالف نعرہ بازی سے جڑے معاملے میں پولیس نے اشونی اپادھیائے سمیت چھ لوگوں کو گرفتار کیا ہے۔‘‘
قابل ذکر ہے کہ گزشتہ اتوار کو جنتر منتر پر ایک احتجاجی مظاہرہ کے دوران کچھ لوگوں نے مسلم مخالف نعرے لگائے تھے جس کی ایک ویڈیو سوشل میڈیا پر وائرل ہو گئی تھی۔ دہلی پولیس نے اس سلسلے میں پیر کے روز معاملہ درج کیا تھا۔ ایک پولیس افسر نے اس بارے میں بتایا کہ ’’اشونی اپادھیائے نے احتجاجی مظاہرہ کا انعقاد کیا تھا۔ انھیں مظاہرہ کی اجازت نہیں دی گئی تھی۔ کسی بھی جلسہ میں غیر قانونی سرگرمی ہوتی ہے، تو ایسے کسی بھی جلسہ کو منعقد کرنے والے کو دیگر لوگوں کے ساتھ ذمہ دار ٹھہرایا جاتا ہے۔‘‘
