نئی دہلی:
سابق بیوروکریٹس کے ایک گروپ نے ایک کھلے خط میں کہا ہے کہ غیر قانونی سرگرمیوں کی روک تھام ایکٹ (یو اے پی اے) اپنی موجودہ شکل میں شہریوں کی آزادی اور جمہوریت کے لیے سنگین خطرہ ہے اور حکومت کو اسے بدلنے کے لیے نیا قانون بنانا چاہئے ۔ انہوں نے کہا کہ یو اے پی اے کی ایک عجیب تاریخ ہے۔
دی وائر نے خبررساں ایجنسی پی ٹی آئی کے حوالہ سے خبر میں آگے بتایا ہے کہ انہوں نے کہا کہ فرقہ واریت ، ذات پات ، علاقائیت اور لسانی قدامت پسندی کا مقابلہ کرنے اور علیحدگی پسند سرگرمیوں میں مصروف تنظیموں سے نمٹنے کے لیےنیشنل انٹیگریشن کونسل کی سفارشات پر 1967 میں منظور یہ قانون وقت کے ساتھ بدلتا گیا ہے اور اب یہ ایک ایسا قانون بن گیا ہے ،جس میں جرائم اور سزا کےنئے زمرے بنا دئے گئے ہیں ۔
’کانسٹی ٹیوشنل کانکٹ گروپ‘کی سرپرستی میں 108سابق بیوروکریٹس کے ذریعہ خط میں کہا گیا ہے کہ یو اے پی اے پانچ دہائیوں سے زیادہ وقت سے بھارت کی قانون کی کتابوں میں موجود ہے اور حالیہ برسوں میں اس میں کی گئیں ترمیمات نے اسے بے رحم جابرانہ اور حکمراں سیاستدانوں اور پولیس کے ہاتھوں غلط استعمال کرنے کے لائق بنا دیا ہے ۔ انہوں نے کہاکہ اس قانون کی موجودہ شکل میں کئی خامیاں ہیں ، جو اسے کچھ سیاستدانوں اور زیادہ حوصلہ افزا پولیس اہلکاروں کےذریعہ بڑے پیمانہ پر غلط استعمال کے لیے ذمہ داری بناتی ہیں۔
خبر رساں ایجنسی پی ٹی آئی کے مطابق خط میں کہا گیا ہے کہ 11 سے 13 جون 2021 کے درمیان برطانیہ کے کارنوال میںG-7سمٹ میں کانفرنس میں ایک سیشن میں حصہ لیتے ہوئے وزیر اعظم نریندر مودی نے جمہوریت اور آزادی کو ہندو ستانی اخلاقیات کاحصہ قرار دیا تھا۔
خط کے مطابق ، ‘اگر وزیر اعظم اپنے قول کے تئیں سچے ہیں ، تو ان کی حکومت کو لازمی طور پر قانونی ماہرین اور عام لوگوں کے تحفظات پر توجہ دینی چاہیے ، یہ تسلیم کرتے ہوئے کہ یو اے پی اے اپنی موجودہ شکل میں ہمارے شہریوں کی آزادی اور جمہوریت کے لیے ایک سنگین خطرہ ہے۔ اس لیے قانونی ماہرین سے مشورے اور پارلیمنٹ کے خیالات کے بعد یو اے پی اے کی جگہ نیا قانون بنایا جانا چاہیے۔
سابق سرکاری ملازمین نے اس سال مارچ میں مرکزی وزیر مملکت برائے داخلہ جی کشن ریڈی کے پارلیمنٹ میں ایک تحریری جواب کا حوالہ دیتے ہوئے کہا کہ 2019 میں ملک بھر میں 1,226 مقدمات میں 1,948 افراد کو یو اے پی اے کے تحت گرفتار کیا گیا تھا جو کہ 2015 سے 72 فیصد زیادہ ہے۔
خط میں کہا گیا ہے کہ سال 2019 میں ملک میں سب سے زیادہ گرفتاریاں ہوئیں۔ خاص طور پر اترپردیش (498) ، منی پور (386) ، تمل ناڈو (308) ، جموں و کشمیر (227) اور جھارکھنڈ (202) میں گرفتاریاں ہوئیں۔ یو اے پی اے کے تحت بڑی تعداد میںگرفتاریوں کے باوجود استغاــثہ اور سزاکی تعداد میں گراوٹ آئی ہے ۔
خط میں کہا گیا ہے کہ حکومت ہند نے تسلیم کیا ہے کہ 2016 اور 2019 کے درمیان رجسٹرڈ مقدمات میں سے صرف 2.2 فیصد معاملے میں ہی قصوروار ثابت ہوا ہے ۔ خط میں کہا گیا ہے کہ ہم یہ نتیجہ نکال سکتے ہیں کہ یو اے پی اے کے تحت زیادہ تر گرفتاریاں صرف خوف اورمایوسی پھیلانے کے خاص مقصد کے لیے کی گئی تھیں۔
خط میں کہا گیا ہے کہ یو اے پی اے کے تحت سب سے زیادہ چونکا دینے والی گرفتاریاں بھیما کورےگاؤں کیس کے ملزمان کی ہوئی ہیں۔ کئی نامور سماجی کارکن جنہوں نے زندگی بھر قبائلیوں اور دیگر مظلوم گروپوں کے حقوق کے لیے جدوجہد کی انہیں دہشت گرد کے طور پر گرفتار کیا گیا اور آج تک جیل میں بند ہیں۔ خط پر دستخط کرنے والوں میں دہلی کے سابق لیفٹیننٹ گورنر نجیب جنگ، سابق سکریٹری خارجہ شیام سرن، سابق سماجی نیائے اینڈ امپاورمنٹ سکریٹری انیتا اگنی ہوتری اور سابق ہیلتھ سکریٹری کے سجاتا راؤ شامل ہیں ۔
