نئی دہلی :
ملک کی راجدھانی دہلی کے چھترپور علاقے میں سی ڈی آر چوک کے نزدیک مزار کی دیوار کو منہدم کرنے کے الزام میں منگل کو دو لوگوں کو گرفتار کیا گیا۔ پولیس نے بتایا کہ ملزمین کی شناخت مغربی دہلی کے بسائی دارا پور کے رہائشی رنجیت اور کنشک کے طور پر ہوئی ہے۔ دونوں کی عمر تقریباً 20سال ہے ۔
خبر رساں ایجنسی پی ٹی آئی (بھاشا)کی رپورٹ کے مطابق ڈپٹی کمشنر آف پولیس (ساؤتھ) اتل کمار ٹھاکر نے کہا کہہمیں پی سی آر پر تقریباً صبح 5 بج کر 40 منٹ پر اطلاع ملی کہ کچھ لوگ سی ڈی آر چوک کے نزدیک مزار کو توڑنے کی کوشش کررہے ہیں ۔ جب ہماری ایمرجنسی رسپانس وہیکل وہاں پہنچی تو افسران نے دیکھا کہ کچھ لوگ مزار کی دیوار توڑنے کی کوشش کررہے تھے ۔ رنجیت اور کنشک نامی نوجوانوں کو موقع پر ہی پکڑلیا گیا ۔
پولیس کے ایک سینئر افسر نے کہاکہ جولائی میں اسی علاقہ میں ایک خاتون کی ایک مزار کو نقصان پہنچانے کی کوشش کرنے کی مبینہ ویڈیو سامنے آئی تھی ، جس میں اس نے دعویٰ کیا تھا کہ اس نے (مزار) آمد ورفت کو متاثر کر رکھا ہے ۔ خاتون کے خلاف معاملہ درج کرکے اسے گرفتار کر لیا گیا تھا ۔
انہوںنے کہاکہ تفتیش کے دوران دونوں ملزمین نے انکشاف کیا کہ انہوں نے سوشل میڈیا پلیٹ فارم پر خاتون کی مبینہ ویڈیو دیکھا اور اس سے متاثر ہو گئے، اس لئے انہوں نے سی ڈی آر چوک جانے اور مزار کو منہدم کرنے کا فیصلہ کیا۔ پولیس نے کہاکہ دونوں کو تعزیرات ہند کی متعلقہ دفعات کے تحت گرفتار کیا گیا ہے ۔ مزار کو ڈھانپ دیا گیا ہے ۔
