سیتاپور جیل میں قد آور لیڈر اعظم خان کی طبیعت بگڑ ی

رام پور :
ہفتہ کے روز سیتا پور جیل میں رکن پارلیمنٹ اور سماجی وادی پارٹی کے قدآور لیڈر محمد اعظم خان کی طبیعت خراب ہوگئی تھی۔ جیل انتظامیہ کی اطلاع پر کے جی ایم یو میں شفٹ کرنے کی تیاری مکمل کرلی گئی۔
کے جی ایم یو انتظامیہ نے ان کو بھرتی کرنے کے لئے بھی ضروری انتظامات کرلئے ہیں۔ تاہم وہ ابھی تک کے جی ایم یو نہیں پہنچے ہیں۔ یہ بھی بتایا جارہا ہے کہ رکن پارلیمنٹ اعظم خان جیل میں ہی علاج مہیا کرانے کی مانگ کررہے ہیں۔
بتادیں کہ ممبر پارلیمنٹ اعظم خان اور ان کے بیٹے عبداللہ اعظم سیتا پور ضلع جیل میں کورونا پازیٹیو ہوگئے تھے۔ جس کے بعد دونوں کو الگ الگ بیرکوں میں کوارنٹین کردیا گیاتھا۔ ضلع اسپتال کی ایک ٹیم نے جیل میں اعظم خان کی صحت کی جانچ کی تھی۔ دونوں کی حالت نارمل ہے۔جیل میں انفیکشن کی وجہ پولیس اہلکاروں کی ڈیوٹی میں تبدیلی بتائی جارہی ہے۔
سیتا پور میں رکن پارلیمنٹ اعظم خان اور بیٹے عبداللہ اعظم ضلع جیل سیتاپور میں ایک سال سے زیادہ عرصہ سے بند ہیں۔ اس دوران وہ کئی پیشی پر رام پور بھی گئے۔ گزشتہ دو ماہ سے ، کورونا انفیکشن میںشدت کی وجہ سے ان کی ضلع جیل سے آن لائن پیشی ہو رہی تھی۔ جیل انتظامیہ کا کہنا ہے کہ اعظم خاں اور ان کے بیٹے کی صحت باقاعدگی سے وقفے سے چیک کی جاتی ہے۔ہفتے کے روز محکمہ صحت کی ٹیم نے جانچ کی۔ اس میں دونوں مثبت پائے گئے۔ اس پر دونوں کو الگ الگ بیرکوں میں کوارنٹین کردیا گیا ہے۔
جیل میں انفیکشن کیسے پہنچا اس کے پیچھے صلع کے افسران کا کہنا ہے کہ باہر سے نقل وحرکت بند ہے ۔پولیس اہلکاروں کی ڈیوٹی تبدیل ہوتی ہے۔ ہوسکتا ہے کہ ان پولیس اہلکاروں کی وجہ سے انفیکشن جیل میں آیا ہو، کئی قیدی بھی مثبت ہیں۔