دبئی، ابو ظہبی والے رہائشی علاقے خالی کردیں:ایران کی وارننگ، آمریکی اہداف نشانے پر، کچھ بڑا ہونے والا ہے؟

ایران نے دبئی اور ابوظبی کی اہم بندرگاہوں کے قریب رہنے والے شہریوں کو انخلا کی وارننگ جاری کردی۔ایرانی میڈیا کے مطابق ایران نے دبئی کی جبل علی پورٹ، ابوظبی کی خلیفہ پورٹ اور فجیرہ پورٹ کے قریب رہائشیوں کو انخلا کی ہدایت کی ہے۔
رپورٹ کے مطابق ان مقامات پر شہری تنصیبات کے درمیان امریکا کی فوجی موجودگی کے مبینہ الزامات کے باعث یہ علاقے جائز اہداف بن چکے ہیں اور خبردار کیا گیا ہے کہ آئندہ چند گھنٹوں میں انہیں نشانہ بنایا جاسکتا ہے
اسی دوران خبر ہے کہ یو اےای کی فجیرہ پورٹ پر ڈرون حملے کے بعد کچھ آئل لوڈنگ آپریشنز معطل کرنا پڑ گئے۔امریکی میڈیا کے مطابق یواےای کی فجیرہ پورٹ پر آج صبح ڈرون حملے کے بعد آگ لگ گئی تھی۔
متحدہ عرب امارات کے فجیرہ میڈیا آفس کا کہنا ہے کہ ڈرون انٹرسیپٹ کرنے کے دوران ملبہ گرنے کے بعد آگ لگی، کسی جانی نقصان کی اطلاع نہیں ملی ہے
خبر ہے کہ ایران نے مشرق وسطیٰ میں امریکی اہداف پر تازہ حملے کرکے اہم تنصیبات کو نشانہ بنایا ہے۔ پاسداران نیول چیف علی تنگسری نے اپنے بیان میں کہا کہ یو اے ای، قطر اور بحرین میں امریکی اڈوں پر حملے کیے ہیں۔ انہوں نے بتایا کہ ان تازہ حملوں میں پیٹریاٹ میزائل سسٹم، جنگی جہاز اور تیل کے ذخیرے کو نشانہ بنایا گیا ہے۔
علی تنگسری کا کہنا ہے کہ شیخ عیسیٰ، العدیری اور الدفرا اڈے نشانے پر لیے۔حملوں میں پیٹریاٹ ریڈار سسٹم، طیاروں کے فیول ٹینکوں، کنٹرول ٹاورز کو نشانہ بنایا۔
•••حماس کا ایران کو مشورہ 
فلسطینی مزاحمتی تنظیم حماس نے ایران پر زور دیا کہ وہ ہمسایہ ممالک کو نشانہ بنانا بند کر دے۔غیر ملکی خبر رساں ادارے کے مطابق حماس نے کہا کہ ایران کو جارحیت کے خلاف دفاع کا حق حاصل ہے، ایران بین الاقوامی قوانین کے مطابق ہر ممکن طریقے سے جارحیت کا جواب دے سکتا ہے۔حماس کا کہنا ہے کہ ایرانی بھائی پڑوسی ممالک کو نشانہ بنانے سے گریز کریں، خطے کے تمام ممالک سے اپیل ہے کہ اس جارحیت کو روکنے میں تعاون کریں۔حماس نے کہا کہ خطے کے ممالک باہمی بھائی چارے کے رشتوں کو برقرار رکھنے کے لیے تعاون کریں