ہندو شدت پسندوں کی طرف سے نماز جمعہ میں خلل ڈالنے کا پائیدار حل کے لیے جمعیۃ کے وفد کی سابق ایم پی محمد ادیب سے ملاقات

گڑگاؤں:( عامر حسین میواتی)

شہر گڑگاؤں میں رہائش پذیر سابق ممبر پارلیمنٹ محمد ادیب سے جمعیۃ علماء میوات گڑگاؤں کے جنرل سکریٹری محمد صابر قاسمی نے پانچ رکنی وفد کے ہمراہ ملاقات کی دوران ملاقات گڑگاؤں میں جمعہ ادائیگی کے مقامات کو لےکر ہندوتوادی تنظیموں کی جانب سے پھیلائی جا رہی کشیدگی کو لے کر تشویش ظاہر کر کے حل تلاش کرنے پر تفصیلی تبادلہ خیال کیا گیا۔

وفد کی قیادت کر رہے مولانا ارشد مدنی جمعیۃ علماء ہند میوات گڑگاؤں کے جنرل سکریٹری مولانا محمد صابر قاسمی نے بتایا کہ ڈیڑھ گھنٹے سے زائد چلی میٹنگ میں گزشتہ ایک ماہ سے جاری شہر میں کشیدہ حالات اور صورتحال پر تفصیلی تبادلہ خیال کیا گیا اور جمعہ کی نماز کی ادائیگی کو لے کر چلایا جا رہے طوفان بدتمیزی پر قدغن لگانے اور کسی نہ کسی موڑ پر پہنچ کر حل تلاش کرنے کا آئندہ کچھ دنوں میں مکمل لائحہ عمل تیار کر کے عملی طور پر کام کرنے تجاویز پر مذاکرہ کیا گیا۔

اس موقع پر محمد ادیب نے مولانا صابر قاسمی کے حوالے کچھ معاملات سپرد کیے جن پر زمینی ورک کرکے سرکار کے سامنے مکمل خاکہ پیش کرکے مسئلے کا پائیدار پر امن حل تلاش کیا جائے گا۔ مولانا محمد صابر قاسمی نے محمد ادیب کو گڑگاؤں کی قدیم 19 مساجد کی تفصیلات پیش کرتے ہوئے، شہر کے قرب و جوار میں کئی درجن مساجد عیدگاہ اور قبرستان و دیگر بڑی تعداد میں وقف املاک کا ذکر کیا جو تقسیم وطن کے بعد سے اب تک غیر آباد چلی آ رہی تھیں تاہم گزشتہ دس سالوں میں ان کی مذہبی شناخت مٹا کر تیزی سے برادرانِ وطن کی طرف سے قبضہ جاری ہے اور جملہ املاک وقف بورڈ کے سبھی مذہبی مقامات مقدسہ پر تیزی سے برادران وطن ہنوز قبضہ کر رہے ہیں۔

ایک تجویز میں مولانا عثمان اویسی چلّی نے کہا کہ اگر موجودہ سرکار گڑگاؤں و اطراف میں مقبوضہ مساجد عیدگاہ و قبرستان و دیگر وقف املاک کی واگزاری کرا کر مسلمانوں کے حوالے کرنے کا کام کرے تو پارکوں میں نماز کی ادائیگی کے مسئلے پر کھڑا کیا جا رہا تنازعہ ہمیشہ کے لیے ختم کیا جا سکتا ہے اور مستقل ایک حل کی طرف مسلمان اس معاملے میں جاسکتے ہیں۔

اس موقع پر سابق ممبر پارلیمنٹ محمد ادیب نے میوات کے اس موقر علماء کے وفد کی کاوشوں کو سراہتے ہوئے ملی و مذہبی امور پر کام کرنے کی حوصلہ افزائی کی اور آئندہ کچھ ایام میں گڑگاؤں و اطراف میں تاریخی مساجد کا دورہ کرنے کی خواہش ظاہر کی، جبکہ محمد ادیب نے کہا کہ گڑگاؤں راجیو چوک عیدگاہ مسجد کو بیک وقت 20 ہزار مصلیان کیصلاحیت کے مطابق بنانے کی تجویز پر غور کیا گیا، تاکہ پارکوں میں نماز جمعہ ادائیگی سے بچا جا سکے۔ وفد میں شامل مولانا محمد صابر قاسمی، مولانا زکریا کھنداؤلی، مولانا عابد امام عیدگاہ جامع مسجد سیکٹر 6 فریدآباد بلب گڑھ، مولانا عثمان اویسی چلّی ،ایڈووکیٹ حیدر اور مجیب روپڑیاو غیرہ ۔