پنجاب اینڈہریانہ ہائی کورٹ نے  جنید خان لنچنگ کے مرکزی ملزم کی درخواست ضمانت مسترد کر دی

پنجاب اور ہریانہ ہائی کورٹ نے 2017 میں 16 سالہ جنید خان کی وحشیانہ لنچنگ کے مرکزی ملزم کی ضمانت کی درخواست کو مسترد کرتے ہوئے کہا کہ جرم کی سنگینی کی وجہ سے کسی بھی ضمانت کی درخواست پر غور کرنے سے پہلے عینی شاہدین کی جانچ کے لیے ایک  محفوظ ماحول کو یقینی بنایا جانا چاہیے۔
اس معاملے میں ابھی دو عینی شاہدین سے پوچھ گچھ ہونا باقی ہے، جس میں کلیدی ملزم نریش کو آئی پی سی کی دفعہ 302، 307، 323، 324، اور 34 کے ساتھ ساتھ ریلوے ایکٹ کی دفعہ 145 کے تحت الزامات کا سامنا ہے۔
چیف جسٹس شیل ناگو نے کہا، ’’یہ عدالت، جرم کی سنگینی کو دیکھتے ہوئے، یہ خیال رکھتی ہے کہ ضمانت کی درخواست پر غور کرنے سے پہلے، چشم دید گواہوں کو جانچ کے لیے  محفوظ ماحول فراہم کیا جانا چاہیے۔‘‘ بہر حال، اس نے عینی شاہدین کی جانچ کے بعد دوبارہ عدالت میں جانے کی آزادی دی۔
22 جون 2017 کو، 16 سالہ جنید خان، جو عید کی خریداری کے بعد دہلی سے متھرا جانے والی ٹرین میں سوار ہوا تھا، کو کھنڈوالی گاؤں میں اپنے گھر واپس آتے ہوئے ایک ہجوم نے مسلمان ہونے کی وجہ سے وحشیانہ حملہ کیا اور جان سے مار دیا۔اس کیس کے ملزمین میں دہلی میونسپل کارپوریشن کے ہیلتھ انسپکٹر نریش کمار، رامیشور داس اور چار دیگر شامل ہیں، جن پر قتل، مجرمانہ قتل اور مذہبی جذبات کو ٹھیس پہنچانے کے ارادے سے الفاظ کہنے سمیت دیگر جرائم کا بھی الزام لگایا گیا ہے۔