قانون  کی واپسی تک  آندولن  جاری رہے گا ـ ممبئی کی پریس کانفرنس میں بورڈ کے اعلی عہدیداران کا اعلان

ممبئی ۱۸ اپریل آل انڈیا مسلم پرسنل لاء بورڈ کے زیر اہتمام حالیہ وقف قانون کی مخالف میں ایک پرہجوم پریس کانفرنس مراٹھی پترکار سنگھ میں منعقد ہوئی، جس میں بورڈ کے اعلی عہدیداران تمام مکاتب فکر کے علماء اور غیر مسلم دانشوران نے خطاب کیا ـ
خطاب کرنے والوں میں مسلم پرسنل لاء بورڈ کے جنرل سکریٹری مولانا فضل الرحیم مجددی، نائب صدر مولانا عبیداللہ اعظمی، نائب صدر سید سعادت اللہ حسینی، بورڈ کے قومی ترجمان سید الیاس قاسم رسول، بورڈ کے مہاراشٹر کنوینئر مولانا محمود احمد خاں  دریابادی، پروفیسر مونسہ بشری عابدی، شیعہ عالم دین مولانا روح ظفر، مولانا عبدالسلام سلفی، شیام کواڑے، وویک کوڑے تھے ـ
  مقررین نے 17 اپریل کے سپریم کورٹ کے فیصلے پر گفتگو کرتے ہوئے بتایا کہ ابھی وقف ایکٹ کی 44 ترمیمات میں سے صرف دو پر عدالت عالیہ نے عارضی روک لگائی ہے، جب تک یہ قانون مکمل واپس نہیں ہوجاتا آل انڈیا مسلم پرسنل لاء بورڈ کی قیادت میں ہماری جدوجہد جاری رہے گی ـ
  بنگال تشدد کے متعلق سوال پر بورڈ کے ترجمان نے ہر قسم کے تشدد سے اظہار بیداری کرتے ہوئے کہا کہ مساجد وغیرہ کے سامنے جو تلواریں لہرا کر اشتعال انگیزی اور پتھراو کیا جاتا ہے اُس تشدد کی بھی مذمت کی جانی چاہیئے ـ
   شرکاء نے یہ بھی کہا کہ حکمران پارٹی نے  اپنی عددی طاقت کی بنیاد پر کروڑوں مسلمانوں، اقلیتوں اور ملک کے انصاف پسندعوام کی مرضی کے خلاف وقف قانوں میں جو من مانی، امتیاز پر مبنی اور ملک کی سب سے بڑی اقلیت کے دستوری و بنیادی حقوق پرتیشہ چلاکر جو ترمیمات منظور کی ہیں، ہم اسے کلیتاً مسترد کرتے ہیں۔
ہم یہ واضح کردینا چاہتے ہیں کہ  یہ ترامیم نہ صرف آئین ہند کے آرٹیکل 25 اور 26 کے تحت دیے گئے بنیادی حقوق کی خلاف ہیں بلکہ وقف کے انتظام و انصرام پر مکمل کنٹرول حاصل کرنے کے حکومت کے ارادے و ناپاک عزائم  کو واضح کرتے ہیں، اس طرح ان ترمیمات کے ذریعہ ملک کی  مسلم اقلیت کو ان کے اپنے مذہبی اوقاف کے آزادانہ انتظام و انصرام سے بھی روک دیا گیا ہے۔ ہندوستانی آئین کی دفعات 25 اور 26 ضمیر کی آزادی کے علاوہ مذہب پر عمل کرنے، تبلیغ کرنے کے حق اور مذہبی اور خیراتی مقاصد کے لیے اداروں کے قیام اور انتظام کے حق کو یقینی بناتی ہیں۔ نیا نافذ کردہ قانون مسلمانوں کو ان بنیادی حقوق سے محروم کرتا ہے۔ سنٹرل وقف کونسل اور وقف بورڈ کے ارکان کے انتخاب سے متعلق ترامیم اس کا واضح ثبوت ہیں۔ مزید  برآں واقف کے لئے  5 سال تک باعمل مسلمان ہونے کی شرط،  ہندوستانی قانونی فریم ورک اور آئین کی دفعات  14 اور 26 کے خلاف اور  شرعی اصولوں سے بھی متصادم ہے۔
مسلم پرسنل لا بورڈ نے اس سلسلے میں جو تفصیلی ہدایات دی ہیں اور 3 ماہ کی پرامن جدوجہد کا جو تفصیلی خاکہ پیش کیا ہے، ان شاءاللہ اسے پوری طاقت اور ایمانداری کے ساتھ بروئے کار لایا جائے گا۔ آج ہماری ریاستی کمیٹی نے غور و فکر کرکے ریاست گیر سطح  کا ایک پروگرام ترتیب دیا ہے۔ ہمارے ساتھ ریاست کی تمام اقلیتی و مذہبی اکائیاں، تمام مذہبی و سیاسی شخصیات اور سول سوسائٹی کے اہم افراد  بھی ہوں گے۔ یہ پورا پروگرام پر امن، دستور و قانون کے دائرے رہے گا۔