نئی دہلی:
ملک میں کورونا وائرس (کووڈ -19) وبا کا قہر بڑھتا ہی جارہا ہے اور گذشتہ 24 گھنٹوں کے دوران 839 کورونا مریضوں کی موت ہونے سے مر نے والوں کی تعداد 1.70 لاکھ کے قریب پہنچ گئی ہے۔
مرکزی وزارت صحت کی جانب سے اتوار کی صبح جاری اعداد و شمار کے مطابق ملک میں 1,52,879 نئے کیسز درج کئے گئے ۔ اس کے ساتھ ہی متاثرہ افراد کی تعداد ایک کروڑ 33 لاکھ 58 ہزار 805 ہوگئی ہے۔ وہیں اس عرصے کے دوران 90,584 مریض صحت یاب ہوئے ہیں ، جس سے اب تک 1,20,81,443 مریض اس وبا سے صحت یاب ہوئے ہیں ۔ ایکٹو کیسز 61,456 بڑھ کر 11,08,087 ہو گئے ہیں۔
اسی دوران مزید 838 مریضوں کی موت ہونے سے اس وبا سے مرنے والوں کی تعداد بڑھ کر 1,69,275 ہوگئی ہے۔ملک میں شفایابی کی شرح جزوی طور پر کم ہر کر 90.44 فیصد ہے اور ایکٹو کیسز کی شرح بڑھ کر 8.29 فیصد ہوگئی ہے جبکہ شرح اموات 1.27 فیصد رہ گئی ہے۔مہا راشٹر کورونا کے ایکٹو کیسز کے معاملے میں سر فہرست ہے ، ریاست میں گذشتہ 24 گھنٹوں کے دوران ایکٹو کیسز 2,097 بڑھ کر 5,38,160 ہو گئے ہیں۔ اس دوران ریاست میں 53,005 مریض صحت یاب ہوئے، جس سے کورونا کو شکست دینے والوں کی تعداد 2748153 پہنچ گئی ، جبکہ 309 مریضوں کی موت ہونے سے مرنے والوں کی تعداد 57638 ہوگئی ہے۔
میٹرو، ڈی ٹی سی-کلسٹر بسوں میں مسافر کی تعداد کم کی گئی
قومی دار الحکومت میں کورونا (کووڈ-19) وبا کے بڑھتے کیسز کے پیش نظر اتوار کے روز دہلی میٹرو، ڈی ٹی سی اور کلسٹر کی بسوں میں سواری کی تعداد کم کر دی گئی ہے۔نئے آرڈر کے بعد اب میٹرو، ڈی ٹی سی اور کلسٹر بسوں میں محض استعداد سے 50 فیصد سواریوں کو ہی سفر کرنے کی اجازت ہے۔میٹرو اور بسوں میں مسافر کی استعداد کو کم کیے جانے کے آج سے جاری حکم کی اطلاع نہ ہونے کے سبب سواریاں بس میں تعینات مارشل سے بحث کرتی نظر آئیں۔ قابل ذکر ہے کہ کورونا کے بڑھتے کیسز کے پیش نظر پہلے سے ہی نائٹ کرفیو کے نفاذ کے ساتھ ہی اسکول بند کر دیے گئے ہیں۔
