نئی دہلی: (ایجنسی)
آنجہانی بی جے پی لیڈر سشما سوراج اور وی ڈی ساورکر کے نام پر اب دہلی یونیورسٹی کے نئے کالجز کا نام رکھا جائے گا۔ دہلی یونیورسٹی کی ایگزیکٹیو کونسل کی میٹنگ میں یہ فیصلہ لیا گیا ہے ۔
خبر رساں ایجنسی پی ٹی آئی کے ذرائع کے مطابق دہلی یونیورسٹی کی ایگزیکٹو کونسل کی میٹنگ میں وائس چانسلر نے فیصلہ کیا کہ نئے تعمیر ہونے والے کالجوں اور سینٹروں کے نام آنجہانی بی جے پی لیڈر سشما سوراج اور ونائک دامودر ساورکر کے نام پر ہوں گے ۔ اگست مہینے میں ہوئی ایگزیکٹیو کونسل کی میٹنگ میں کالج کا نام سشما سوراج ، سوامی وویکا نند، وی ڈی ساورکر اور سردار پٹیل کے نام پر رکھنے پر غور کیا گیا تھا۔
اس کے ساتھ ایگزیکٹیو کونسل نے اٹل بہاری واجپئی، ساوتری بائی پھولے، ارون جیٹلی، چودھری برہم پرکاش اور سی ڈی دیشمکھ کے نام کا تجویز کیے تھے۔ دہلی یونیورسٹی کے وائس چانسلر کو ناموں پر حتمی فیصلہ لینے کا اختیار دیا گیا تھا۔ ایگزیکٹو کونسل کی میٹنگ میں دہلی یونیورسٹی میں اسسٹنٹ پروفیسر کی تقرری کے عمل میں تبدیلی کی تجویز کو بھی منظوری دی گئی ہے۔
اس سے قبل اسسٹنٹ پروفیسر کی تقرری کے لیے انٹرویو کے لیے بلائے جانے والے امیدواروں کی تعداد کو محدود کرنے کی تجویز تھی۔ بعد میں اسے ہٹا دیا گیا۔ نئے قوانین کے مطابق کالج میں داخلے کے لیے امیدواروں کی تعداد کی کوئی حد نہیں ہوگی۔ جبکہ یونیورسٹی کے مختلف شعبہ جات میں پہلی اسامی کے لیے کم از کم 30 امیدواروں کو بلایا جائے گا اور اس کے بعد ہر اسامی کے لیے 10-10 امیدواروں کو بلایا جائے گا۔ ایگزیکٹو کونسل نے یہ فیصلہ تین ممبران سیما داس، راجپال سنگھ پوار اور ایڈووکیٹ اشوک اگروال کے اختلاف کے باوجود لیا۔
