نئی دہلی :
دہلی کے نائب وزیر اعلیٰ منیش سسودیا کا کہنا ہے کہ کیجریوال مودی کا سیاسی متبادل ہوسکتے ہیں ،اسی کے ساتھ انہوں نے الزام لگایاکہ بی جے پی عوام کے ذریعہ منتخب کردہ حکومت کے حقوق چھین رہی ہے تاکہ پچھلے دروازے سے اقتدار پر قبضہ کرلے۔واضح رہے کہ دہلی کے لیفٹیننٹ گورنر کے اختیارات بڑھانے کے بل کی منظوری کے ساتھ ہی دہلی کے لیفٹیننٹ گورنر کے اختیارات میں بے حد اضافہ ہو گیاہے۔ اس کے بارے میں حزب اختلاف کی تقریباً تمام جماعتوں نے مرکزی حکومت کے خلاف احتجاج کیا۔ اس قدم کو غیر جمہوری قرار دیتے ہوئے دہلی کے نائب وزیر اعلیٰ منیش سسودیا نے وزیر اعظم مودی پر وزیراعلیٰ اروند کجریوال کے اقدامات سے خوفزدہ ہونے کا الزام لگایا۔ انہوں نے کہا کہ وزیر اعظم اور پوری مرکزی حکومت دہلی حکومت کے ترقیاتی کاموں اور عوام میں بڑھتے ہوئے اعتماد سے خوفزدہ ہوگئی ہے۔ پورا ملک جانتا ہے کہ وزیر اعظم مودی کے متبادل کے لئے صحیح انتخاب اروند کیجریوال ہوسکتے ہیں۔انہوں نے کہاکہ اروند کیجریوال عوام سے اپنے تمام وعدے پورے کررہے ہیں۔ وہ اپنی بات پر عمل کرکے یہ ظاہر کرتے ہیں۔ وہ صرف وعدے نہیں کرتے ہیں۔
انہوں نے دعویٰ کیا کہ مودی حکومت ناکام ہوگئی ہے۔ جب وہ خود کچھ کرنے سے قاصر ہوتی ہے تو وہ دوسروں کو پریشان کرنا شروع کردیتی ہے۔ پی ایم مودی دہلی حکومت کے تمام اچھے کاموں میں رکاوٹیں ڈالنے میں مصروف ہیں۔ جب وہ اس میں کامیاب نہیں ہوسکے تو انہوں نے دہلی حکومت کے اختیار کو ختم کرنا شروع کردیا۔ اس کے لئے وہ کوئی بھی اقدام اٹھاسکتے ہیں، لیکن دہلی کے لوگ اسے دیکھ رہے ہیں۔ وہ اس کو برداشت نہیں کریں گے اور مرکز کی بی جے پی حکومت کو بلند آواز میں سبق سکھائیں گے۔
