جدت پیدا نہیں کی گئی تو زراعت بوجھ بن جائے گی: پی ایم مودی

نئی دہلی:
وزیراعظم نریندر نے ملک کے عوام سے کورونا ویکسین کا ٹیکہ لینے کی اپیل کرتے ہوئے کہا ہے کہ اس کے ساتھ ساتھ کووڈ-19 کے ضابطوں پر سختی سے عمل کیا جانا چاہئے۔ مسٹر مودی نے اتوار کو آکاشوانی پر اپنے ماہانہ پروگرام ’من کی بات‘ کے 75ویں ایڈیشن میں ملک کے عوام سے خطاب کرتے ہوئے کہا کہ کووڈ-19 کی وبا سے نمٹنے کےلئے کورونا ویکسین کا طویل عرصے سے انتظار تھا۔ ملک میں کووڈ -19 کا ٹیکہ لگانے کی مہم چل رہی ہے جو دنیا میں سب سے بڑی ہے۔ انہوں نے کہا کہ سبھی اہل افراد کو کورونا کا ٹیکہ لگوانا چاہئے۔ انہوں نے کہا کہ اس کے ساتھ ہی وبا سے نمٹنے کے ضابطوں جیسے ماسک پہننا، دو گز کی دوری رکھنا اور بار بار ہاتھ دھونے پر عمل کرنا چاہئے۔مسٹر مودی نے کہا،’’پچھلے سال یہ مارچ کا ہی مہینہ تھا ،ملک نے پہلی بارجنتا کرفیو لفظ سنا تھا۔ لیکن اس عظیم ملک کی عظمت عوام کی طاقت کا تجربہ دیکھئے،جنتا کرفیو پوری دنیا کےلئے حیرت کی بات بن گئی تھی۔ ڈسپلن کی یہ انوکھی مثال تھی،آنے والی نسلیں اس بات پر ضرور فخر کریں گی۔‘انہوں نے کہاکہ کورونا سپاہیوں کے تئیں عزت و احترام ،تھالی بجانا،تالی بجانا،دیا جلانا۔ آپ کو اندازہ نہیں ہے کہ کورونا سپاہیوں کے دل کو کتنا چھو گیا تھا اور وہی تو وجہ ہے،جو پورے سال بھر،وہ بغیر رکے،تھکے ،ڈٹے رہے۔ ملک کے ایک ایک شہری کی جان بچانے کےلئے جی جان سے لگے رہے۔‘‘
وزیراعظم نریندر مودی نے زراعت کے لیے جدت اور نئے پن پر زور دیتے ہوئے اتوار کے روز کہا کہ ایسا نہ کرنے پر یہ بوجھ بن جائے گی۔ وزیراعظم نے ریڈیو پر نشر ہونے والے اپنے ماہانہ پروگرام ’من کی بات‘ کے 75ویں ایڈیشن میں کہا کہ زرعی شعبے میں جدت طرازی بہت ضروی ہے کیونکہ اس سے روزگار کے مواقع پیدا ہوں گے اور کسانوں کی آمدنی بڑھے گی۔انہوں نے کہا کہ ’زندگی کے ہر شعبے میں نیا پن، جدت طرازی ضروری ہوتی ہے ورنہ وہی کبھی کبھی ہمارے لیے بوجھ بن جاتی ہے۔ ہندوستان کی کھیتی کی دنیا میں-جدت طرازی، یہ وقت کا تقاضا ہے۔ بہت دیر ہو چکی ہے۔ ہم بہت وقت برباد کر چکے ہیں۔ زرعی شعبے میں روزگار کے نئے مواقع پیدا کرنے کے لیے کسانوں کی آمدنی بڑھانے کے لیے روایتی کھیتی کے ساتھ ہی نئی سہولتوں کو، نئے نئے اختراعات کو، اختیار کرنا بھی اتنا ہی ضروری ہے‘۔