مراد آباد : (ایجنسی)
یوپی کے ایک تھانہ میں بی جے پی لیڈروں کی غنڈہ گردی کا ایک ویڈیو تیزی سوشل میڈیا پر وائرل ہو رہا ہے ۔ ویڈیو میں بی جے پی لیڈر اور کارکنان تھانے میں گھستے نظر آرہے ہیں ۔ اس دوران ایک شخص پولیس کی ٹیبل پر رکھی فائلیں بھی پھینک رہا ہے ۔
یہ واقعہ مراد آباد ضلع کے منجھولہ تھانہ کا ہے ۔ بتایا جا رہا ہے کہ یہ ہنگامہ بی جے پی یوا مورچہ کے میٹروپولیٹن صدر ابھیشیک اور ان کے حامیوں نے کیا تھا۔ بی جے پی لیڈر منڈل صدر پر کی گئی کارروائی کی مخالفت کررہے تھے ۔ ویڈیو میں تقریباً 25-30لوگ دکھائی دے رہے ہیں۔ اس دوران غصے میں ایک بی جے پی لیڈر تھانہ انچاج کے سامنے ٹیبل پر رکھی فائلوں کو پھینکتے ہوئے سنائی دیتا ہے کہ ہم دکھائیں گے کیسے ہوتی ہے شانتی بھنگ ۔
موصولہ اطلاع کے مطابق درگا پوجا کے حوالے سے دو گروپوں کے درمیان جھگڑا ہوگیا تھا۔ جب واقعہ کا معاملہ پولیس تک پہنچا تو پولیس نے معاملہ حل کرنے کی کوشش کی ، لیکن وہ کامیاب نہ ہو سکی۔ دوسرے فریق نے الگ جگہ پوچا منعقد کرنے کی اجازت مانگی، جس کی مخالف فریق نے مخالفت کی۔ اس کے بعد پولیس نے امن میں خلل ڈالنے کے شبہ کے پیش نظر پابند کی کارراوئی کی۔
اس میں امن میں خلل ڈالنے کے شبہ کی وجہ سے بی جے پی کے منڈل صدر کو بھی پابند کردیا گیا، جس کی جانکاری ملنے کے بعد بی جے پی کے لیڈر اور کارکنان تھانہ پہنچ گئے اور ہنگامہ شروع کردیا۔ جس کے بعد پولیس نے ویڈیو بنانا شروع کردیا۔ اسی بات پر بی جے پی کے یوا مورچہ کے ابھیشک چوبے بھڑک گئے ،فائلیں پھینکنی شروع کردی۔ اس کے بعد تھانہ انچارج نے کسی طرح سے معاملے کو سمجھا کر پرسکون کیا۔ معاملے کی جانکاری جب سینئر پولیس افسران کو ملی تو انہوں نے ایف آئی آر درج کرنے کاحکم دیا ۔
مراد آباد کے سپرنٹنڈنٹ پولیس امت کمار آنند نےمعاملے کی جانکاری دیتے ہوئے کہاکہ منجھولہ تھانہ میں سات اکتوبر کو کچھ لوگوں نے ہنگامہ کیا۔ انہوں نے سرکاری معاملوں میں بھی دخل دینے کی کوشش کی۔ منجھولہ تھانہ میں 41 بدمعاشوں کے خلاف معاملہ درج کیا گیا ہے ، جن میں 35 نامعلوم اور 6 نامزد ہیں۔ اس معاملے میں پولیس آگے کی کارروائی کے لیے جانچ میں مصروف ہے ۔
