سری نگر:(ایجنسی)
جموں و کشمیر میں فوج کی کارروائی سے بوکھلائے دہشت گردوں نے اتوار کے روز ضلع کولگام میں دو غیر مقامی مزدوروں کو گولی مار کر ہلاک اور ایک کو زخمی کردیا۔ تینوں مزدور بہار کے رہنے والے ہیں۔ اس دہشت گردانہ حملے میں راجہ ریشی دیو اور جوگندر ریشی دیو کی موت ہو گئی جبکہ ایک مزدور شدید طور پر زخمی ہوا ہے۔
قابل ذکر ہے کہ جموں و کشمیر میں تقریبا 24 گھنٹوں سے بھی کم وقت میں غیر مقامی مزدوروں پر یہ تیسرا حملہ ہے۔ بہار سے تعلق رکھنے والے گلی کوچوں کے دکاندار اروند کمار اور اترپردیش کے بڑھئی صغیر احمد کا سنیچر کی شام دہشت گردوں نے گولی مار کر قتل کردیا۔
کشمیر زون پولیس نے اپنے ٹویٹر ہینڈل پر کہا ، "دہشت گردوں نے کولگام کے وانپوہ علاقے میں غیر مقامی مزدوروں پر اندھا دھند فائرنگ کی۔ دہشت گردی کے اس واقعے میں دو غیر مقامی افراد ہلاک اور ایک زخمی ہوا۔ انہوں نے بتایا کہ پولیس اور سکیورٹی فورسز نے علاقے کا محاصرہ کرلیا ہے۔ افسران کے مطابق دہشت گرد مزدوروں کے کرائے کے مکان میں داخل ہوئے اور ان پر اندھا دھند گولیاں برسائیں۔
واضح ہو کہ 6 اکتوبر کے بعد سے وادی میں کئی شہری ہلاک ہوئے ہیں خاص طور پر وہ لوگ جو ریاست سے باہر کے ہیں۔ گزشتہ 11 دنوں کے دوران اب تک نو شہری ہلاک ہو چکے ہیں۔
6 اکتوبر سے کشمیر میں شہریوں کے قتل کا سلسلہ جاری ہے۔ 6 اکتوبر کو دہشت گردوں نے معروف فارمیسی مالک ایم ایل بندرو ، ایک غیر مقامی اسٹریٹ وینڈر اور ایک ٹیکسی ڈرائیور کا قتل کر دیا تھا۔ ٹھیک اسی کے دو دن بعد دہشت گردوں نے سرینگر شہر کے عیدگاہ علاقے میں اسکول کی پرنسپل سپندر کور اور ٹیچر دیپک شرما کو گولی مار کر ہلاک کردیا۔
