لکھنؤ : (ایجنسی)
اتر پردیش کے وزیر اعلیٰ یوگی آدتیہ ناتھ نے فیض آباد ریلوے جنکشن کا نام بدل کر ایودھیا کینٹ کرنے کا فیصلہ کیا ہے۔ معلومات کے مطابق اسے حکومت ہند نے منظوری دے دی ہے۔ اتر پردیش کے وزیر اعلیٰ کے دفتر (سی ایم او) نے ایک ٹویٹ کے ذریعے کہا کہ یوپی کے وزیر اعلیٰ یوگی آدتیہ ناتھ نے فیض آباد ریلوے جنکشن کا نام بدل کر ایودھیا کینٹ کرنے کا فیصلہ کیا ہے۔
بی جے پی ایم پی للو سنگھ نے سی ایم یوگی کو فیض آباد جنکشن کا نام بدل کر ایودھیا کینٹ کرنے کی تجویز پیش کی تھی۔ اب انہوں نے فیض آباد ریلوے اسٹیشن کا نام بدل کر ایودھیا کینٹ کرنے کے فیصلے پر خوشی کا اظہار کرتے ہوئے شکریہ ادا کیا ہے۔
بتا دیں کہ اتر پردیش کی یوگی حکومت نے پہلے الہ آباد کا نام بدل کر پریاگ راج اور فیض آباد کا نام ایودھیا کر دیا ہے۔ جبکہ مغل سرائے کا نام بدل کر دین دیال اپادھیائے نگر کیا جاچکا ہے ۔ ریاستی حکومت نے کچھ عرصہ پہلے جھانسی ریلوے اسٹیشن کا نام رانی لکشمی بائی کے نام پر رکھنے کی سفارش کی تھی۔
اس کے علاوہ حال ہی میں یوگی حکومت نے دہلی میں یوپی سدن کا نام اب اترپردیش سدن تریوینی جبکہ یوپی بھون کا نام اترپردیش بھون رکھنے کااعلان کیا تھا ۔
