لکھنؤ: (ایجنسی)
تریپورہ میں شرپسند عناصر کے ذریعہ مسلمانوں پر ہورہے مظالم اورتشدد کے خلاف مجلس علماء ہند کے جنرل سکریٹری مولانا سید کلب جواد نقوی نے خط لکھ کر احتجاج کیا ہے۔ انہوںوزیر اعظم نریندرمودی کے دفتر اور وزیر داخلہ امت شاہ کو خط لکھ کر قصور واروں کے خلاف سخت کارروائی کرنے اوراقلیتی برادری کو تحفظ فراہم کرنے کا مطالبہ کیا ہے ۔
مولانا کی جانب سے لکھے گئے خط میں لکھا گیا ہے کہ تریپورہ میں اقلیتی برادری شرپسندوں کے مظالم اور بربریت سے خوف و ہراس کی حالت میں ہے لیکن تریپورہ حکومت اور انتظامیہ کی جانب سے کوئی مناسب کارروائی نہیں کی گئی۔ تریپورہ میں جس طرح مسلمانوں کے گھروں، عبادت گاہوں، ان کی جان و مال اور خواتین کی عزت کو نشانہ بنایا ہے، وہ قابل افسوس اور قابل مذمت ہے۔ گزشتہ ایک ہفتے کے دوران تریپورہ کے مختلف حصوں میں شرپسند عناصر نے مسلم اقلیتوں کو خوفزدہ کرنے کی ہر ممکن کوشش کی ہے۔ ان کے گھروں کو آگ لگا دی گئی۔
مساجد پر حملے کرکےاپنی تنظیموں کے جھنڈے مسجد کے میناروں پر لہرائے گئے، ان کے گھروں پر پتھراؤ کیا گیا اور گھروں سے باہر نکلتے وقت لوگوں کو مارا گیا۔ خاص کر انا کوٹی، مغربی ترپیورہ ، سپاہیجالا اور گومتی تریپورہ اضلاع میں مسلمانوں کے خلاف ہولناک مظالم اور بربریت جاری ہے ،یہ بدقسمتی کی بات ہے کہ ابھی تک ترپیورہ سرکار کےذریعہ شرپسندوں کےخلاف کوئی مناسب کارروائی نہیں کی گئی ہے جس سے اقلیتوں برادریوں میں مزید خوف وہراس ہے ۔
