امبیڈکر نگر:(ایجنسی)
بی ایس پی سے برطرف سابق وزیر رام اچل راج بھر اور لال جی ورما کو ایس پی میں شامل کرانے امبیڈکر نگر پہنچے سابق وزیر اعلیٰ اکھلیش یادو نے زور دے کر کہا کہ 2022 میں پردیش سے بی جے پی کا صفایا ہونا یقینی ہے۔ اکھلیش نے کہاکہ اتنی بڑی حمایت پوری یوپی میں ایس پی کو پہلی مل رہی ہے ۔ روز ہی لیڈروں کے ایس پی سے جوڑنے کا سلسلہ بڑھ رہا ہے ۔ یہ حمایت اس بار یوپی میں تاریخ رقم کرے گی۔ ایس پی اتحاد 400 سیٹ جیتے گا۔
سابق وزیر اعلیٰ نے بی جے پی سرکار پر حملہ بولتے ہوئے کہاکہ نوجوانوں کو نہ تو روزگار دیا گیا اور نہ ہی لیپ ٹاپ ۔ اب جو لوگ الیکشن دیکھ ٹیبلٹ دینے کا وعدہ کرنے والے پہلے یہ بتائیں کہ گزشتہ ساڑھے چار سال سے کہاں تھے؟ کسانوںکا ذکر کرتے ہوئے کہا کہ کھاد کے دام بڑھا دیئے گئے۔ کسانوں کو کوئی سننے والا نہیں ہے۔ ان پر گاڑیاں الگ سے چڑھا دی جارہی ہیں۔
ایس پی صدر نے پوروانچل ایکسپریس وے کے افتتاح کا حوالہ دیتےہوئے سرکار کی خوب تنقید کی۔ انہوںنے کہاکہ ہم ہوتے توکم وقت میں اچھی سڑک بن جاتی۔ آگرہ ایکسپریس وے کاذکر کرتے ہوئے کہاکہ ویسی سڑک یہ سرکارنہیں بناپائی۔ طنز کرتے ہوئے کہاکہ بلڈوزر چلانے کاذکر کرنےوالے سی ایم نے اگر سڑک پر ٹھیک سے بلڈوزرچلوا دیاہوتا توپوروانچل ایکسپریس وے بہتر بن گیا ہوتا۔
اکھلیش نے کہا کہ ہمیں یوپی کو پھر سے خوشحالی کی راہ پر لے جانا ہے۔ ہم ایسا کر پائیں گے ۔ ایس پی کی سرکار آنے والی ہے ۔ سماج کا ہر طبقہ یوگی سرکار سے پریشان ہے۔ انہوں نے طنز یہ انداز میں کہاکہ آخر پیٹرول اور ڈیزل کی قیمتیں اور بھی تو کم کرنی ہے۔ یوپی میں بی جے پی کی ہار ہوتے ہی قیمتیں مزید کم ہوں گی۔
اس سے پہلے ایس پی میں شامل ہونے والے سابق وزراء رام اچل راج بھر اور لال جی ورما نے کہا کہ بابا صاحب ڈاکٹر بھیم راؤ امبیڈکر اور ڈاکٹر رام منوہر لوہیا کے نظریات پر چلتے ہوئے ہم 2022 میں اکھلیش یادو کو سی ایم بنانے کے لیے کام کریں گے۔ جلسہ سے سابق وزراء بلرام یادو، للائی یادو وغیرہ نے بھی خطاب کیا۔
