گروگرام ہریانہ سرکار کےالاٹ کردہ عوامی مقامات پر نماز پڑھنے کے حوالے سے جاری ہنگامہ تھمنے کا نام نہیں لے رہا۔ جمعہ، 3 دسمبر کو، پولیس نے سیکٹر 37 میں نماز کے دوران ہنگامہ کرنے پر کئی لوگوں کو حراست میں لیا ہے۔پولیس کی بھاری نفری کی تعیناتی کے درمیان کچھ مظاہرین نے نماز کے دوران ‘جے شری رام’ کے نعرے لگائے۔ ہندوتواوادی تنظیموں سے تعلق رکھنے والے لوگوں کی نماز کے حوالے سے پولیس کے ساتھ جھگڑا بھی ہوا۔ واقعے کے بعد سامنے آنے والی ویڈیو میں دیکھا جا سکتا ہے کہ ہنگامہ کرنے والے لوگ پولیس سے کہہ رہے ہیں کہ اگر انہیں گرفتار بھی کر لیا جائے تو وہ احتجاج سے پیچھے نہیں ہٹیں گےنماز کی مخالفت کرنے والے ایک شخص نے پولیس کو بتایا، ’’ہم یہاں کچھ غلط نہیں کر رہے ہیں۔ یہ زمین ہمارے گاؤں میں ہے، آپ ہمیں یہاں آنے سے کیسے روک سکتے ہیں؟گروگرام میں کئی بار نماز کے خلاف احتجاج کی قیادت کرنے والے بھارت ماتا واہنی تنظیم کے رہنما دنیش بھارتی کو آج بھی مظاہرین کے ساتھ دیکھا گیا، بعد میں انہیں پولیس نے حراست میں لے لیا۔
آج کا واقعہ ایک ایسے وقت میں پیش آیا ہے جب چند روز قبل 3 ہندوتواوادی کی تنظیموں کے رہنماؤں کے خلاف اشتعال انگیز بیانات کی شکایت درج کی گئی تھی۔ جمیعت علمائے ہند نے ان لیڈروں کی شکایت گروگرام پولیس سے کی تھی۔
یہ الزام لگایا گیا ہے کہ یہ رہنما اشتعال انگیز بیان بازی کے ذریعے سماجی ہم آہنگی کو خراب کرنے کی کوشش کر رہے ہیں۔ غور طلب ہے کہ گزشتہ 3 ماہ سے دائیں بازو کی کئی تنظیمیں گروگرام میں کھلے عام نماز کی مخالفت کر رہی ہیں۔ ان تنظیموں نے سیکٹر 12، سیکٹر 47 سمیت کئی جگہوں پر نماز کی مخالفت کی ہے۔
