تہران: ایران کے سپریم لیڈر آیت اللہ علی خامنہ ای کے سرکاری جنازے کی تقریبات کے دوران ایک منظر نے ہر شخص کو غمزدہ کر دیا، جب ان کی 14 ماہ کی پوتی زہرا محمدی گلپایگانی کا چھوٹا تابوت بھی مرکزی ہال میں رکھا گیا۔ ننھی بچی کی تصویر اور قومی پرچم میں لپٹا ہوا تابوت دیکھ کر جنازے میں شریک افراد آبدیدہ ہو گئے۔
آیت اللہ علی خامنہ ای، ان کی پوتی اور خاندان کے کئی دیگر افراد 28 فروری کو امریکی اور اسرائیلی حملوں میں جاں بحق ہوئے تھے۔ جنازے کے موقع پر خامنہ ای کا تابوت اسلامی جمہوریہ ایران کے قومی پرچم میں لپٹا ہوا تھا، جبکہ ان کی سیاہ عمامہ بھی تابوت پر رکھا گیا تھا۔
اہلِ خانہ کو بھی آخری خراجِ عقیدت
سرکاری تقریب میں خامنہ ای کے دیگر جاں بحق اہلِ خانہ کے تابوت بھی ان کے ساتھ رکھے گئے۔ ان میں ان کے داماد، بڑی صاحبزادی اور ایران کے نئے سپریم لیڈر آیت اللہ مجتبیٰ خامنہ ای کی اہلیہ بھی شامل تھیں، جو اسی حملے میں جان کی بازی ہار گئے تھے۔
جنازے کی سرکاری تقریبات کے آغاز سے قبل تہران کے گرینڈ مصلیٰ میں تمام تابوت ایک ساتھ رکھے گئے، جہاں ہزاروں افراد نے انہیں آخری خراجِ عقیدت پیش کیا۔ تقریب کے دوران سیکیورٹی کے سخت انتظامات کیے گئے تھے اور ملک بھر سے بڑی تعداد میں شہری شریک ہوئے۔
