نئی دہلی: ایودھیا کے رام مندر میں چندے کی مبینہ چوری کے معاملے پر راشٹریہ سویم سیوک سنگھ (آر ایس ایس) نے گہری تشویش کا اظہار کرتے ہوئے اس واقعے کو نہایت افسوسناک قرار دیا ہے۔ آر ایس ایس نے مطالبہ کیا ہے کہ اس معاملے میں ملوث افراد کے خلاف سخت قانونی کارروائی کی جائے اور مندر کے انتظامی نظام میں مکمل شفافیت اور جوابدہی کو یقینی بنایا جائے۔
مندر ٹرسٹ سے شفافیت بڑھانے کی اپیل
آر ایس ایس کے سرکاریہ واہ دتاتریہ ہوسبالے نے جاری بیان میں کہا کہ شری رام جنم بھومی مندر کروڑوں عقیدت مندوں کے ایمان اور برسوں کی قربانیوں کی علامت ہے، اس لیے اس واقعے کو غیر معمولی سمجھتے ہوئے شری رام جنم بھومی تیرتھ کشیتر ٹرسٹ کو انتظامی اور مالیاتی نظام میں موجود تمام خامیوں کو فوری طور پر دور کرنا چاہیے۔ ان کا کہنا تھا کہ اس معاملے سے پیدا ہونے والی بے یقینی جلد ختم ہونی چاہیے تاکہ عقیدت مندوں کا اعتماد برقرار رہے۔
ہندو سماج سے صبر و تحمل کی اپیل
آر ایس ایس نے کہا کہ اسے یقین ہے کہ شفاف مالیاتی نظم، مضبوط انتظامی نظام اور مذہبی تقدس کے تحفظ کے ذریعے مندر ٹرسٹ عوام کا اعتماد مزید مستحکم کرے گا۔ تنظیم نے تحقیقات مکمل ہونے تک ہندو سماج سے صبر اور تحمل کا مظاہرہ کرنے کی بھی اپیل کی۔
بیان میں مزید کہا گیا کہ بعض عناصر اس واقعے کو بنیاد بنا کر ہندو سماج اور اس کے مذہبی اداروں کو بدنام کرنے کی کوشش کر سکتے ہیں، اس لیے عوام کو چاہیے کہ وہ کسی بھی افواہ یا اشتعال انگیزی سے دور رہیں اور تحقیقات کے نتائج کا انتظار کریں۔
