نئی دہلی(پریس ریلیز)
آل انڈیا یونانی طبّی کانگریس فارمیسی ونگ کے زیراہتمام شاہین باغ، نئی دہلی میں مفت یونانی میڈیکل کیمپ کا اہتمام کیا گیا۔ کیمپ سے بڑے پیمانے پر لوگوں نے استفادہ کیا۔ اس موقع پر جہاں معالجین کی طرف سے معائنہ و مشورہ دیا گیاوہیں بلڈ پریشر، شوگر، ٹمپریچر اور آکسیجن کا ٹیسٹ بھی مفت میں کیا گیا۔
کیمپ کی افتتاہی تقریب سے خطاب کرتے ہوئے پروفیسر محمد ادریس (سابق پرنسپل، طبیہ کالج قرول باغ، نئی دہلی) نے کہا کہ کووڈ 19 اگرچہ اپنے اثرات میں فی الحال کم ہوگیا ہے لیکن اس کے خطرات سے ہمیں محتاط رہنا لازمی ہے۔ انہوں نے طب یونانی کی افادیت اور میڈیکل کیمپ کی اہمیت پر روشنی ڈالتے ہوئے کہا کہ پہلے کے مقابلے میں آج اس طرح کے پروگرام کی سخت ضرورت ہے اور اس کو اس علاقے میں آرگنائز کرانے والی نوجوان شخصیت حکیم نعیم رضا اورمحمد سلمان قابل مبارک باد ہیں۔
انہوں نے مزید کہا کہ اطباءحضرات کو خصوصیت سے کارخیر کی عادت اختیار کرنی چاہیے۔ اخلاص کا پیمانہ بھی بڑا ہوناچاہیے۔ تقریب کی صدارت سابق مشیر یونانی، حکومت ہند ڈاکٹر محمد طاہر نے کی۔ انہوں نے کہا کہ طب یونانی کے وجود کو برقرار رکھنے اور اس کے فروغ کے لیے آل انڈیا یونانی طبّی کانگریس کی تحریک قابل تحسین ہے۔ انہوں نے خاص طور سے طبّی کانگریس کے سکریٹری جنرل ڈاکٹر سیّد احمد خاں، حکومت دہلی کے محکمہ آیوش سے وابستہ سینئر آفیسر ڈاکٹر حبیب اللہ کے علاوہ ٹیم میں شامل ڈاکٹر الطاف احمد، ڈاکٹر صغیر احمد صدیقی، ڈاکٹر محمد عامر، ڈاکٹر شاداب عالم، ڈاکٹر رقیہ، حکیم عطاءالرحمن اجملی، حکیم محمد مرتضیٰ دہلوی کو بھی مبارک باد پیش کی اور کہا کہ ان کی اعزازی خدمات لائق ستائش ہیں۔
مذکورہ کیمپ میں آل انڈیا یونانی طبّی کانگریس فارمیسی وِنگ سے وابستہ پرویز احمد خاں (راحت ہربل)، حکیم ارباب الدین (صدر دواخانہ)، جناب شکیل احمد (ثنا ہربلز)، حکیم عزیر بقائی، محمد نوشاد (اسکائی ہربل)، محمد جلیس (لمرا)، واحد اختر (ہرماس)، محمد عاصم (ریکس ریمیڈیز)، حکیم محمد صادق، حکیم محمد اویس گورکھپوری وغیرہ نے دواؤں کی فراہمی اور تقسیم میں اپنی خدمات پیش کیں۔ تمام شرکاءکا شکریہ حکیم نعیم رضا نے ادا کیا۔
