نئی دہلی:(پریس ریلیز)
جماعت اسلامی ہند کے نائب امیر پروفیسر سلیم انجینئر نے ناگالینڈ کے مون ضلع کے اوٹنگ گاؤں کے قریب ترو کے علاقے میں شہریوں کی ہلاکتوں پر صدمے اور تشویش کا اظہار کیا ہے۔ میڈیا کے لیے جاری کردہ ایک بیان میں نائب امیر جماعت اسلامی ہند نے کہا: 15 سے زائد نہتے شہریوں اور ایک فوجی کی ہلاکت کی خبر سے ہمیں حیرانی اور تشویش ہے۔
میڈیا کی اطلاعات کے مطابق فوج نے کوئیلہ کی کان کے مزدوروں کو لے جانے والی وین پر شک کی بنیاد پر فائرنگ کی تھی۔مزدوراپنے گاؤں اوٹنگ کی طرف بڑھ رہے تھے۔بتایا جا رہا ہے کہ بعد ازاں دیہاتیوں نے مسلح افراد پر حملہ بول دیا اور مسلح فوجیوں نے اپنے بچاو کے لئے فائرینگ کی جس کے نتیجہ میں سات افراد کی اموات واقع ہوئی، اور اسی جھڑپ میں ایک فوجی بھی مارا گیا۔ ہم اس جانی نقصان پر ان کے لواحقین اور رشتہ داروں کے ساتھ غم میں شریک ہیں اور امید کرتے ہیں کہ حکومت کی طرف سے اعلان کردہ اعلیٰ سطحی تحقیقات سے اس واقعہ کی حقیقت سامنے آئے گی اور ان ہلاکتوں میں ملوث کسی کو بھی نہیں بخشا جانا چاہیے۔ یہ واقعہ ہمارے انٹیلی جنس اداروں کی ناکامی کو بھی ظاہر کرتا ہے۔ہم مہلوکین کے لواحقین کو مناسب معاوضہ دینے کا مطالبہ کرتے ہیں۔
جماعت اسلامی ہند کا احساس ہے کہ فوج کے لیے یہ بے حد ضروری ہے کہ وہ امن و امان یا لا اینڈ آرڈر کی برقراری کے لیے ان کے زیر کنٹرول علاقے میں عام شہریوں کے ساتھ نمٹنے میں انتہائی محتاط اور حساس رہے۔ کچھ مشتبہ سرگرمیوں کے دوران عام شہریوں سے نمٹنے سے متعلق رہنما ہدایات کی سختی سے تعمیل ہونی چاہیے۔ ہمیں امید ہے کہ یہ واقعات دوبارہ نہیں ہوں گے اور غمزدہ خاندانوں کے لیے انصاف کو یقینی بنایا جائے گا۔
