کانپور : (ایجنسی)
اتر پردیش کے کانپور دیہات سے پولیس کی بربریت کا ایک چونکا دینے والا ویڈیو سامنے آیا ہے۔ ویڈیو میں ایک پولیس اہلکار بچے کو گود میں لئے ہوئے ایک شخص کو بے رحمی سے پیٹتے ہوئے نظر آ رہا ہے۔
تقریباً دو منٹ طویل اس ویڈیو میں دیکھا جا سکتا ہے کہ کئی پولیس اہلکار پہلے ایک شخص کو پیٹ رہے ہیں۔ اس کے بعد وہ اسے گاڑی میں بٹھاتے ہیں۔ اس کے بعد ایک پولیس اہلکار لاٹھی سے بچے کو گود میں لئے ہوئے شخص پر لاٹھی چالاتاہے۔ ویڈیو میں پیچھے سے لوگوں کی آواز سنی جا سکتی ہے،جو کہہ رہے ہیں کہ ’ بچے کو لگ جائے گی۔‘
جب وہ شخص بھاگنے کی کوشش کرتا ہے تو پولیس اہلکار اس شخص کو کھینچ کر پولیس گاڑی کی طرف لاتا ہے ۔ اس کے بعد پولیس اہلکار بچے کو جبراً کھینچنے کی کوشش کرتاہے ۔ ویڈیو میں بچے کو روتےہوئے دیکھا جاسکتا ہے۔
ویڈیو کے وائرل ہونے کے بعد، پولیس نے ایک بیان میں اعتراف کیا کہ ’ہلکی طاقت‘ کا استعمال کیا گیا تھا۔ کانپور دیہات پولیس نے کہا کہ پولیس کا ایسا سلوک قابل قبول نہیں ہے اور اے ڈی جی زون کانپور کو معاملے کی تحقیقات کرنے اور قصوروار پولیس اہلکاروں کے خلاف مناسب کارروائی کرنے کی ہدایت دی گئی ہے۔
پولیس نے کہا کہ ابتدائی رپورٹوں سے پتہ چلتا ہے کہ کچھ مظاہرین نے ضلع اسپتال کی او پی ڈی کو بند کر دیا تھا، اور اس کی خدمات میں خلل ڈالا تھا۔ بیان میں، پولیس نے کہا،’جب پولیس چیف میڈیکل سپرنٹنڈنٹ کی درخواست پر نظم و ضبط کی بحالی کے لیے گئی تو ان پر حملہ کیا گیا، جس کے بعد ہلکی طاقت کا استعمال کیا گیا، تاہم یہ پولیس کی بے حسی کا جواز نہیں بنتا۔
ورون گاندھی نے اپنی ہی حکومت کو نشانہ بنایا
پیلی بھیت سے بی جے پی کے رکن پارلیمنٹ ورون گاندھی نے ایک بار پھر اپنی ہی حکومت پر طنز کیا اور لکھا، ’ مضبوط امن و امان وہ ہے جہاں کمزور سے کمزور شخص کو انصاف مل سکے ۔ مضبوط امن و امان وہ ہے، جہاں قانون کا خوف ہو، پولیس نہیں۔‘
