دہرادون:(ایجنسی)
بلی بائی ایپ تنازع کے سلسلے میں بڑی کارروائی کرتے ہوئے، ممبئی پولیس نے منگل کو اتراکھنڈ سے 18 سالہ شویتا سنگھ کو گرفتار کیا اور سرخیوں میں کہا گیا کہ یہ لڑکی اس پورے معاملے کی ماسٹر مائنڈ تھی۔ اس سے ایک دن پہلے،جس 21 سالہ انجینئرنگ طالب علم کو بنگلور سےگرفتار کیا گیا تھا،شویتا اس کی ساتھی بھی پائی گئی۔ دونوں مبینہ طور پر سوشل میڈیا پر اس وقت رابطے میں آئے تھے جب انہوں نے نظریات میں مماثلت دیکھی تھی۔ اس کے بعد دونوں میں دوستی ہوگئی اور دونوں نے مسلم خواتین کی تصاویر ’نیلامی‘ والےویب پیجز کا کھیل شروع کیا۔
نیوز 18 ہندی کے مطابق بتایا جا رہا ہے کہ GitHub نامی کوڈ شیئرنگ پلیٹ فارم پر متنازع ویب پیج ہوسٹنگ معاملے میں پہلا ویب پیج جولائی 2021 میں سامنے آیا تھا جبکہ دوسرا یکم جنوری کو بلی بائی کے نام سے سامنے آیا ۔ ان پیجز پر معروف مسلم خواتین کے خلاف توہین آمیز مواد پایا گیاتھا، جس نے تنازعہ کو جنم دیا۔ اس سلسلے میں ٹویٹر کے ذریعے ٹریس کیے گئے وشال کمار جھا کو پہلے گرفتار کیا گیا اور اس کے بعد ممبئی کے سائبر کرائم سیل نے شویتا کو اتراکھنڈ کے اودھم سنگھ نگر ضلع میں واقع رودر پور سے گرفتار کیا۔
والدین کو کھوچکی ہے شویتا
اس معاملے کے حوالے سے میڈیا میں آنے والی خبروں کے مطابق شویتا اپنے تین بہن بھائیوں کے ساتھ رودر پور میں رہتی ہیں اور گزشتہ سال مئی کے مہینے میں ان کے والد کی کووڈ- 19 کی وجہ سے موت ہو گئی تھی۔ اس سے قبل 2011 میں ان کی والدہ کینسر کے باعث انتقال کر گئی تھیں۔ ایچ ٹی رپورٹ نے اتراکھنڈ پولیس کے ایک سینئر افسر کا حوالہ دیتے ہوئے کہا کہ شویتا ‘’ہندوتوا نظریے‘ سے وابستہ تھیں اور سوشل میڈیا پر اس طرح کا مواد اکثر پوسٹ کرتی تھیں۔
اتراکھنڈ پولیس افسر نے نام ظاہر نہ کرنے کی شرط پر بتایا، ’اسی نظریے سے جڑی ایک پوسٹ پر بحث کے دوران، دونوں ملزمین رابطے میں آئے اور پھر وہاٹس ایپ پر چیٹنگ شروع کی اور دوستی ہو گئی…اس کے بعد ممبئی پولیس کےذریعہ کی گئی پوچھ گچھ میں شویتا نے کسی قسم کے پچھتاوے سے بھی انکار کیا۔
یہاں ایک اور پولیس افسر کے حوالے سے رپورٹ میں بتایا گیا کہ شویتا مالی طور پر کمزور پس منظر کی لڑکی ہے، جس نے 12ویں جماعت پاس کی ہے، لیکن اس نے ابھی تک کالج میں داخلہ نہیں لیا ہے۔ شویتا کو منگل کو ٹرانزٹ ریمانڈ کے لیے مقامی عدالت میں پیش کیا گیا، جہاں سے اسے ریمانڈ پر ممبئی پولیس کے حوالے کر دیا گیا۔
یہ نیٹ ورک کتنا بڑا ہے؟
کیا کوئی اور ہے جو اس کیس کا ماسٹر مائنڈ ہے؟ اس خاتون کے اس آئی ٹی گینگ میں مزید کتنے لوگ شامل ہیں؟ ممبئی سائبر سیل ان تمام پہلوؤں کی جانچ کر رہا ہے۔ رپورٹس کے مطابق پوچھ گچھ کے دوران جو کچھ سامنے آیا ہے اس کے مطابق شویتا نے پولیس کو ایک نیپالی ساتھی کے بارے میں بتایا ہے، جس کا نام وہ گیاؤ کہہ رہی ہے۔ ادھراتراکھنڈ کے ڈی جی پی اشوک کمار نے اس معاملے پر کہا کہ اتراکھنڈ پولیس نے ملزم سے پوچھ گچھ نہیں کی، صرف ممبئی پولیس کے ساتھ تعاون کیا۔
