اترپردیش : ہر اتوار کو لاک ڈاؤن ، ماسک نہ پہننے پر 1 ہزار کا جرمانہ

لکھنؤ
اترپردیش حکومت نے کورونا انفیکشن سے نمٹنے کے لئے تمام اضلاع میں ماسک نہ پہننے پرایک ہزار روپے جرمانے کا حکم دیا ہے۔ اس کے علاوہ اتر پردیش حکومت نے بھی ہر اتوار کو پوری ریاست میں لاک ڈاؤن کا حکم دیا ہے۔ گزشتہ روز اتر پردیش حکومت نے 2000 سے زیادہ کورونا کیس والے ضلع میں نائٹ کرفیوکی آخری تاریخ میں توسیع بھی کردی تھی۔
دریں اثنا اتر پردیش کے وزیر اعلیٰ یوگی آدتیہ ناتھ نے جمعہ کے روز حکام کو ہدایت دی کہ وہ اسپتالوں میں بستروں اور آکسیجن کی دستیابی کو یقینی بنانے کے لئے لکھنؤ میں 1000 بستروں پر مشتمل نیا کووڈ اسپتال قائم کرے۔وزیراعلیٰ یوگی آدتیہ ناتھ نے جمعہ کے روزضلع مجسٹریٹ اور چیف میڈیکل آفیسرز کے علاوہ اپنی ٹیم کے 11 اعلیٰ عہدیداروں کے ساتھ جائزہ میٹنگ میں ضروری ہدایات دیں اور کہا کہ راجدھانی لکھنؤ میں 1000 بستروں پر مشتمل ایک نیا کووڈ اسپتال قائم کیا جائے۔ڈیفنس ایکسپو آیوجن استھل اس کے لئے بہتر جگہ ہوسکتی ہے۔ اس سلسلے میں فوری کارروائی کو یقینی بنایا جائے۔
اتر پردیش حکومت نے جمعہ کے روز اعلان کیا کہ اب پوری ریاست میں ہر اتوار کو لاک ڈاؤن ہوگا اور ماسک نہ پہننے پر پہلی بار ایک ہزار روپے جرمانہ عائد کیا جائے گا۔ ریاستی حکومت نے تمام دیہی اور شہری علاقوں میں ہر اتوار کو ہفتہ وار لاک ڈاؤن نافذ کرنے کا فیصلہ کیا ہے۔ اس دوران ہنگامی خدمات کے سوا تمام بازار اور دفاتر بند رہیں گے۔ صرف سینیٹری اور ہنگامی خدمات چلیں گے۔
ایک سرکاری بیان کے مطابق وزیر اعلیٰ نے ایک اجلاس کے دوران لوگوں کو ماسک پہننے کے لئے حوصلہ افزائی کرنے کو کہا ہے۔ انہوں نے ہدایت دی ہےکہ اگر کوئی پہلی بار ماسک پہنے بغیر پکڑا گیا تو اس پر ایک ہزار روپے جرمانہ عائد کیا جانا چاہئے اور اگر وہ شخص دوسری بار پکڑا گیا تو اس پر دس گنا زیادہ جرمانہ عائد کیا جائے۔
وزیراعلیٰ یوگی آدتیہ ناتھ نے کہا کہ پچھلے سال ایم ایل اے فنڈ کورونا وائرس سے بچاؤ سے متعلق کاموں میں بہت کارآمد ثابت ہوا تھا اور اس سال بھی کووڈ کیئر فنڈ کے قواعد کے مطابق ان کے فنڈز کووڈ مینجمنٹ میں ان کی سفارش پر استعمال کیا جاسکتا ہے۔ انہوں نے کہا کہ پنچایت انتخابات کا پہلا مرحلہ انتہائی پرامن انداز میں مکمل ہوا ۔ جن علاقوں میں ماحول خراب کرنے کی کوشش کی گئی ، ایسی سرگرمیوں میں ملوث افراد کے خلاف سخت قانونی کارروائی کی جائے تاکہ دوسرے مرحلے کے انتخابات کے لئے مثال بن جائے۔
واضح رہے کہ اتر پردیش کے وزیر اعلیٰ یوگی آدتیہ ناتھ نے ویڈیو کانفرنسنگ کے ذریعے ریاست میں کورونا انفیکشن سے نمٹنے کے لئے قائم کمیٹی سے ایک میٹنگ کی۔ اس مدت کے دوران وزیر اعلیٰ نے کئی ضروری گائیڈلائن بھی جاری کیں ، جن میں ریاست کے دس اضلاع میں نائٹ کرفیو بھی شامل ہے۔ وزیر اعلیٰ یوگی آدتیہ ناتھ نے اجلاس میں کہا کہ 2000 سے زیادہ کورونا کیسز والے اضلاع میں شام 8 بجے سے صبح 7 بجے تک نائٹ کرفیو نافذ کیا جانا چاہئے۔ انہوں نے عہدیداروں سے بھی کہا کہ وہ ریاست کے لوگوں کو کورونا پروٹوکول کی اہمیت کو سمجھائیں۔