پٹنہ :
بہار میں کورونا انفیکشن بہت تیزی سے پھیل رہا ہے۔ ریاست میں انفیکشن شرح اب 13 فیصد تک پہنچ گئی ہے۔ گزشتہ روز بہار میں 12795 متاثر مریض ملے ، جبکہ انفیکشن کی وجہ سےمزید 68 لوگوں کی جان چلی گئی۔ اب ریاست میں فعال کیسز کی تعداد 87,154 ہوگئی ہے۔ ان سب کے درمیان ایمس نے نتیش سرکار کو وارنگ دی ہے کہ بہار میں سخت لاک ڈاؤن لگایا جائے نہیں تو حالات قابو سے باہر ہوجائیں گے۔
ریمیڈ سیور انجکشن کی کمی پر سرکار نے بڑا فیصلہ لیا ہے، خصوصی طیارہ سے احمد سے بہار انجکشن لایا گیا۔ وہیں پٹنہ کے آئی جی آئی ایم ایس میں محض ایک گھنٹے کا آکسیجن بچا ہے۔ صبح آٹھ بجے آکسیجن آنا تھا جو اب تک نہیں پہنچا ۔ سگنا موڑ کے پاس سمے ہاسپٹل کے پاس محض تین گھنٹے کا آکسیجن بچا ہے۔ ایسے میں مریضوں کو باہر نکالا جارہا ہے۔ اسپتال میں 74 مریض بھرتی ہیں ۔ ہتاچی اسپتال میں آکسیجن کی کمی کی وجہ سے مریضوں کو دوسرے اسپتال میں شفٹ کرایا گیا۔
محکمہ صحت کے مطابق گزشتہ 24 گھنٹے کے دوران پٹنہ میں 23 ، مظفر پور میں نو، نالندہ میں سات، بھاگلپور میں چار، دربھنگہ میں تین، اورونگ آباد ،گیا ،مادھوپور ،مغربی چمپارن ، مشرقی چمپارن اور سیوان میں دو – دو اور اوریا ، ارول ،بانکا ، جہاں آباد ، مدھوبنی ،مونگیر ،سہرسا ، سارن ، سیتا مڑھی اور سپول میں ایک ایک مریض کی موت ہوگئی۔ اس انفیکشن سے مرنے والوں کی تعداد اتوار کو بڑھ کر 2155 ہوگئی ۔
کورونا کے خوف کا منظر لوگ ہوئے گھروں میں بند
بہار کے اورنگ آباد ضلع کا گاؤں کمربھگوان ،شہر سے پانچ کلومیٹر دور پولیس لائن کی طرف واقع ہے۔ جہاں گاؤں میں چار لوگ کورونا پازیٹیو ہوگئے ہیں۔ گاؤں کی آبادی تقریباً ڈیڑھ سے دو ہزار ہوگی۔ کورونا سے بچاؤ کے لیے گاؤں والوں نے اپنے آپ کو گھروں میں قید کرلیا ہے۔ لوگ گزشتہ ایک ہفتہ سے اپنے گھروں سے باہر نہیں نکلے ہیں۔ صورت حال یہ ہے کہ دوائیں ختم ہو رہی ہے تو لوگ گھروں سے باہر نہیں نکل رہے ہیں۔
