لکھنؤ :
کورونا سے اتر پردیش کی بے قابو صورتحال کو مدنظر رکھتے ہوئے ریاستی حکومت نے ہفتہ واری لاک ڈاؤن میں ایک دن کی مزید توسیع کردی ہے۔اب ریاست میں جمعہ کی شام آٹھ بجے سے منگل کی صبح سات بجے تک بند رہے گا۔
در اصل گزشتہ منگل کوالٰہ آباد ہائی کورٹ نے ریاست میں کورونا کی صورتحال پر سماعت کرتے ہوئے کہا تھا کہ دو دن کا لاک ڈاؤن ناکافی ہے، سرکار نے اپنے ثواب دید کے مطابق انفیکشن کی چین توڑنے کے لیے دو دن کا لاک ڈاؤن لگایا ہے، ساتھ ہی دیگر پابندیاں بھی لاگو کی ہیں ،مگر انفیکشن کے نئے معاملات کو دیکھتے ہوئے یہ بیکار ہی لگ رہا ہے۔یہ اقدامات ناکافی لگتے ہیں۔ لاک ڈاؤن کو منگل کی صبح تک بڑھانے کے پیچھے ہائی کورٹ کے اس تبصرے کو بھی ایک وجہ مانا جارہا ہے۔
اس سے قبل ریاستی حکومت نے 16 اپریل کو 35 گھنٹے کا لاک ڈاؤن نافذ کرنے کا اعلان کیا تھا ، جو ہفتہ کی رات 8 بجے سے پیر کی صبح 7 بجے تک لاگو تھا۔ تاہم اس میں ترمیم کرتے ہوئے جمعہ کی رات آٹھ بجے سے پیر کی صبح سات بجے تک لاک ڈاؤن کا فیصلہ کیا گیاتھا اور اس میں ایک دن کی توسیع کردی گئی ہے، اب ریاست میں جمعہ کی رات 8 بجے سے منگل کی صبح 7 بجے تک لاک ڈاؤن کانفاذ رہے گا۔
اس کے ساتھ ہی ریاستی حکومت نے ماسک نہیں پہننے والوں کے خلاف سخت کارروائی کرنے کی ہدایت دی ہے۔ بغیر ماسک کے باہر نکلنے پر پہلی بار ایک ہزار روپے جرمانہ لیا جائے گا ۔ دوسری بار 10 گنا زیادہ جرمانہ دینا ہوگا۔ ریاستی حکومت نے کورونا پروٹوکول پر سختی سے عمل کرنے کی ہدایتدی ہے ۔
